ՌԴ ԱԳՆ-ի անհասցե հայտարարությունը Բաքվի կողմից անցակետի տեղադրման հետ կապված

ՌԴ ԱԳՆ-ն անդրադարձել է Ադրբեջանի կողմից Լաչինի միջանցքում ապօրինի անցակետի տեղադրմանը, ինչպես միշտ՝ անհասցե և Բաքվի գործողությունները չդատապարտող հայտարարությամբ։

«Մենք լուրջ մտահոգություն ենք հայտնում Լեռնային Ղարաբաղում, հայ-ադրբեջանական շփման գծում ռուսական խաղաղապահ զորախմբի պատասխանատվության գոտում, ինչպես նաև պաշտոնական Բաքվի և Երևանի միջև երկխոսության իրավիճակի վերաբերյալ։ Ծայրահեղ մտահոգությամբ ենք արձանագրում հրադադարի ռեժիմի խախտման դեպքերի և տարաբնույթ միջադեպերի աճ, որոնք պարբերաբար երկու կողմից հանգեցնում են զոհերի։ Ոչ պակաս վտանգավոր ենք համարում Ադրբեջանի և Հայաստանի հանրային տարածքում մեղադրական ու ագրեսիվ հռետորաբանության աճը։ Ապրիլի 23-ի իրադարձությունների վերջին զարգացման համատեքստում մենք հատկապես նշում ենք ցանկացած միակողմանի քայլի անընդունելիությունը, որը խախտում է Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի եռակողմ հայտարարության հիմնական դրույթները, արդյո՞ք խոսքը Լաչինի միջանցքի շահագործման ռեժիմի չհամաձայնեցված փոփոխության կամ այն ​​օգտագործելու փորձերի մասին է, որոնք չեն համապատասխանում խաղաղության օրակարգին։ Կոչ ենք անում կողմերին վերադառնալ գոյություն ունեցող պայմանավորվածություններին։ Ելնում ենք նրանից, որ տեղի բնակչությունը չպետք է տուժի և որևէ խոչընդոտ չպետք է ստեղծվի  նրա կենսագործունեության համար»,- ասվում է հայտարարության մեջ։

«Մենք գտնում ենք, որ առաջացած շատ խնդիրներ Ռուսաստանի, Ադրբեջանի և Հայաստանի ղեկավարների միջև եռակողմ համաձայնությունների հիմնական ուղիների հիման վրա բանակցային գործընթացում առաջընթացի բացակայության հետևանք են, ներառյալ՝ տարածաշրջանում տրանսպորտային հաղորդակցությունների ապաշրջափակումը, հայ-ադրբեջանական սահմանի դելիմիտացիայի, խաղաղության պայմանագրի չափորոշիչների համաձայնեցումը։ Հույս ունենք, որ Բաքվում և Երևանում քաղաքական կամք կդրսևորեն և կկարողանան առաջիկայում հաղթահարել այդ բացասական դինամիկան։ Ռուսական կողմը պատրաստ է անհրաժեշտ օգնություն ցուցաբերել իրեն մտերիմ Ադրբեջանին և Հայաստանին՝ ինչպես քաղաքական մակարդակում, այնպես էլ «գետնի վրա»՝ ռուս խաղաղապահների հրամանատարության մասնակցությամբ։ Մենք նաև զգուշացնում ենք արտաքին արևմտյան խաղացողներին և նրանց օրակարգով աշխատող տեղական ռուսատյաց տարրերին իրավիճակը սրելու փորձերից, այդ թվում՝ Ռուսաստանին սևացնող արշավի միջոցով»,- ասվում է ՌԴ ԱԳՆ հայտարարության մեջ։

ՌԴ ԱԳՆ-ն, սակայն, չի նշում, թե ինչպես է նոյեմբերի 9-ի եռակողմ հայտարարության խախտմամբ ադրբեջանական անցակետը հայտնվել ռուս խաղաղապահների պատասխանտվության գոտում գտնվող Լաչինի միջանցքով, և երբ է Մոսկվան կատարելու եռակողմ հայտարարությամբ ստանձնած իր պարտավորությունը՝ ապահովելով Լաչինի միջանցքով անխափան երթևեկը։

Էմմա Չոբանյան