Արեգա բարձունքն ազատագրած անձնակազմին «Նահանջ» հրաման տալու մեջ մեղադրող ՊԲ նախկին հրամանատար Միքայել Արզումանյանի գործով նիստը դռնփակ քննելու որոշում է կայացվել

Հակակոռուպցիոն դատարանում՝ նախագահությամբ դատավոր Վարդգես Սարգսյանի, այսօր սկսվում է Արցախի պաշտպանության նախկին նախարար, գեներալ-լեյտենանտ Միքայել Արզումանյանի գործով առաջին դատական նիստը։

Արզումանյանը մեղադրվում է 2020 թվականի 44-օրյա պատերազմի ժամանակ ռազմավարական կարևոր նշանակություն ունեցող «Արեգա» բարձունքը և հարակից մարտական դիրքերն ազատագրած անձնակազմին «Նահանջ» հրաման տալու, ինչպես նաև՝ Շուշիի պաշտպանության կազմակերպման ընթացքում ծառայողական պարտականությունների նկատմամբ անփույթ վերաբերմունք դրսևորելու մեջ։ Նա գտնվում է կալանքի տակ։

Այսօր առավոտյան Բարձրագույն դատական խորհրդի կայքում բացակայում էր նիստի վերաբերյալ տեղեկությունը։ Այն բանից հետո, երբ Արզումանյանի պաշտպան Երեմ Սարգյանը ֆեյսբուքյան իր էջում հրապարակեց նիստի վերաբերյալ տեղեկությունը, Խորհրդի կայքում Հակակոռուպցիոն դատարանում քննվող գործերի ցանկում ավելացվեց Արզումանյանի գործի վերաբերյալ տեղեկությունը՝ միաժամանակ նշում կատարելով, որ նիստը դռնփակ է։ Ենթադրվում է, որ գործը դատաքննության նշանակելիս դատավորը միանձնյա է կայացրել այն դռնփակ քննելու վերաբերյալ որոշում, սակայն Արզումանյանի պաշտպան Երեմ Սարգսյանը Factor.am-ի հետ զրույցում ասաց, որ միջնորդություն է ներկայացնելու նիստը դռնբաց անցկացնելու վերաբերյալ։

Գործով Քննչական կոմիտեի տարածած հաղորդագրության համաձայն Միքայել Արզումանյանն Ադրբեջանի Հանրապետության ռազմաքաղաքական ղեկավարության կողմից Արցախի Հանրապետության դեմ սանձազերծած ագրեսիվ պատերազմի ընթացքում, հայտարարված ռազմական դրության պայմաններում՝ 2020 թվականի հոկտեմբերի 30-ից մինչև նոյեմբերի 9-ն ընկած ժամանակահատվածում, Շուշի քաղաքի և հարակից շրջանների պաշտպանության կազմակերպման ընթացքում անփույթ վերաբերմունք է դրսևորել իր ծառայողական պարտականությունների նկատմամբ՝ չկատարելով և ոչ պատշաճ կատարելով դրանք, որպիսի գործողություններն անզգուշությամբ առաջացրել են ծանր հետևանքներ. հակառակորդի զինված ուժերն ամբողջությամբ իրենց վերահսկողության տակ են վերցրել Շուշի քաղաքը և մատույցները, յուրային ստորաբաժանումները կրել են զոհեր և վիրավորներ։

Ըստ ՔԿ հաղորդագրության՝ «Գեներալ-լեյտենանտ Մ.Ա.-ն, անձնական պատասխանատվություն կրելով ենթակա զորքերի պատրաստության և պատրաստականության, կիրառման, ինչպես նաև՝ զորքերին (ուժերին) առաջադրված խնդիրների հաջող կատարման համար, 2020 թվականի հոկտեմբերի 30-ից Շուշի քաղաքի և հարակից շրջանների պաշտպանողական օպերացիայի կազմակերպման ընթացքում չի ապահովել զորքերի (ուժերի) մարտական հնարավորությունների արդյունավետ օգտագործումն ու սահմանված ժամկետներում առաջադրված խնդիրների հաջող կատարումը, չի վերահսկել առաջադրված խնդիրների կատարումը և չի ցուցաբերել անհրաժեշտ օգնություն, ընդունած որոշումների իրականացման նկատմամբ չի դրսևորել հաստատակամություն ու վճռակա­նություն, օպերատիվ ու ճկուն չի արձա­գանքել ստեղծված իրադրության փոփոխություններին, չի ապահովել զորքերի կիրառման կայունությունը, անընդհատությունը, օպերատիվությունը, ներդաշնակ և լիարժեք հրամանատարությունը։

Մասնավորապես, գեներալ-լեյտենանտ Մ.Ա.-ն իր կողմից արձակված մարտական կարգադրությամբ Շուշիի հարակից շրջանների պաշտպանական բնագծի չպահվող հատվածում չի հանձնարարել զորք տեղակայել, չի նշել հարևանների խնդիրները, սահմանազատման գծերը: Հոկտեմբերի 31-ին N ստորաբաժանման զբաղեցրած բնագծի աջակողմյան տեղամասում, ինչպես նաև Շուշի-Լիսագոր ավտոմայրուղու հատվածում անհրաժեշտ պաշտպանություն չի կազմակերպել, այն պայմաններում, երբ դեռևս հոկտեմբերի 27-ից իր ենթակայության տակ ունեցել է Շուշիի ուղղությունում գտնվող N զորամասի հենքի վրա կազմավորված 95 զինծառայողներից բաղկացած հատուկ հրաձգային վաշտը, հոկտեմբերի 27-ից և 28-ից՝ իրենց պաշտպանության տեղամասից դուրս եկած՝ համապատասխանաբար N զորամասի երկու առանձին գումարտակները՝ բաղկացած ընդհանուր 365 զինծառայողներից, որոնք տվյալ ժամանակահատվածում ներգրավված չեն եղել մարտական խնդիրների կատարմանը։ Արզումանյանն իրեն առաջադրված մեղադրանքը չի ընդունում։

Արաքս Մամուլյան