04.11.2024 | 23:04
Ադրբեջանի ՊՆ ղեկավարը Սլովակիայում ռազմատեխնիկական համագործակցության հարցեր է քննարկել
Թեհրանը Բաքվից պահանջել է բացատրություն տալ Իսրայելի հետ «հակաիրանական համագործակցության» վերաբերյալ
Քաղաքականություն
31.03.2023 | 15:00
Իրանը մտահոգություն է հայտնել Ադրբեջանի և Իսրայելի ռազմավարական գործընկերության համատեղ ծրագրերի վերաբերյալ և բացատրություն պահանջել Բաքվից։ Այս մասին ասել է Իրանի ԱԳՆ պաշտոնական ներկայացուցիչ Նասեր Քանանին, գրում է ՏԱՍՍ-ը։
Ըստ պաշտոնյայի՝ այս համագործակցությունը «դավադրություն» է, որն Իսրայելը պատրաստում է Իրանի դեմ Ադրբեջանի տարածքում։
Իրանի ԱԳՆ Telegram-ալիքի հաղորդագրության համաձայն՝ Քանանին բացատրություններ է պահանջել Բաքվից՝ կապված Ադրբեջանի և Իսրայելի միջև «ռազմավարական գործընկերության նոր փուլի» մասին հայտարարությունների հետ, որի նպատակը, նրա պնդմամբ, «միասնական հակաիրանական ճակատ» ստեղծելն է։ ԱԳՆ խոսնակը նաև մատնանշել է «Իրանի և Ադրբեջանի ժողովուրդների միջև անքակտելի պատմական և կրոնական կապերը»։
Նշենք, որ չորեքշաբթի Իսրայելի արտգործնախարար Էլի Քոհենը հրեական պետություն այցով ժամանած ադրբեջանցի գործընկեր Ջեյհուն Բայրամովի հետ հանդիպումից հետո ասել է, որ Իսրայելն ու Ադրբեջանը պետք է համատեղ դիմակայեն Իրանին։
«Մենք պետք է միասին աշխատենք, որպեսզի թույլ չտանք Իրանին ձեռք բերել [ռազմական] միջուկային կարողություն: Դա կարելի է անել քաղաքական և տնտեսական գործիքների միջոցով՝ միաժամանակ ստեղծելով վստահելի և շոշափելի ռազմական սպառնալիք»,- ասել է Քոհենը:
Տաթև Ֆռանգյան
