Քաղաքականություն
31.03.2023 | 14:18
Միացյալ Նահանգները հայտարարել է, որ պատժամիջոցներ է սահմանում Սլովակիայի քաղաքացու նկատմամբ՝ Ռուսաստանին երկու տասնյակից ավելի հյուսիսկորեական զենք և զինամթերք վաճառելու փորձ կազմակերպելու համար, գրում է VOA-ն:
«Պատերազմի սկզբից ի վեր Ռուսաստանը կորցրել է ավելի քան 9,000 միավոր ծանր ռազմական տեխնիկա, և բազմակողմ պատժամիջոցների ու ներմուծման վերահսկման շնորհիվ Պուտինը հուսահատորեն փորձում է դրանք փոխարինել»,- ասված է ֆինանսների նախարար Ջանեթ Յելլենի հայտարարության մեջ։
Ֆինանսների նախարարությունը հայտնել է, որ պատժամիջոցներ է սահմանել Սլովակիայի քաղաքացի Աշոտ Մկրտիչևի նկատմամբ՝ «ուղիղ կամ անուղակի կերպով Հյուսիսային Կորեա կամ Հյուսիսային Կորեայից զենք կամ դրա հետ կապված նյութական միջոցներ ներմուծելու, արտահանելու կամ վերաարտահանելու փորձի համար»։
Տեղեկացվում է, որ 2022 թվականի վերջից մինչ 2023 թվականի սկիզբը Մկրտիչևը համագործակցել է ԿԺԴՀ պաշտոնատար անձանց հետ, որպեսզի ՌԴ-ի համար ստանա ավելի քան երկու տասնյակ տեսակի զենք ու սպառազինություն կոմերցիոն ինքնաթիռների, հումքի, ապրանքների և այլ նյութերի ուղարկման դիմաց, նշվում է հաղորդագրության մեջ։
«Զենքի վաճառքի գործարքների նման սխեմաները, որոնք նա փորձում է իրականացնել, ցույց են տալիս, որ Պուտինը դիմում է ծայրահեղ միջոցների, ինչպես, օրինակ, Իրանից և ԿԺԴՀ-ից մատակարարումները»,- հավելել է Յելլենը։
Տաթև Ֆռանգյան
