15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Հունաստանի հետ դրական մթնոլորտի պահպանումը ձեռնտու է երկու կողմերին․ Թուրքիայի Անվտանգության խորհուրդ
Քաղաքականություն
31.03.2023 | 17:00
Թուրքիայի նախագահ Ռեջեփ Թայիփ Էրդողանի գլխավորությամբ նախօրեին տեղի է ունեցել Ազգային անվտանգության խորհրդի նիստը, որի արդյունքներով տարածվել է հայտարարություն, գրում է Անադոլու գործակալությունը։
Հայտարարության մեջ ասվում է, որ ԱԱԽ նիստում քննարկվել են բնական աղետների բոլոր տեսակի բացասական հետևանքների վերացմանն ուղղված միջոցառումները, քաղաքացիների և երկրի ուժային կառույցների խաղաղության և բարեկեցության ապահովման հարցեր։ Խորհրդակցությանը գնահատական է տրվել երկրաշարժից հետո ստեղծված իրավիճակին։
Փաստաթղթի համաձայն՝ ԱԱԽ-ն տեղեկացվել է Թուրքիայի անվտանգության ուժերի կողմից երկրի անվտանգությանը սպառնացող բոլոր տեսակի սպառնալիքների դեմ իրականացվող վճռական և հաջող գործողությունների մասին, մասնավորապես, «PKK/KCK-PYD/YPG, FETÖ և ԻԼԻՊ ահաբեկչական կազմակերպությունների դեմ, որոնք իրականացվել են ինչպես Թուրքիայում, այնպես էլ նրա սահմաններից դուրս»։
Բացի այդ, Անվտանգության խորհրդի անդամները քննարկել են Ռուսաստանի և Ուկրաինայի միջև պատերազմի բացասական հետևանքները, որը շարունակվում է ավելի քան մեկ տարի և բացասաբար է անդրադառնում տարածաշրջանի այլ երկրների կայունության և Սև ծովի անվտանգության վրա։ Նշվել է, որ կայուն խաղաղության հաստատման, տարածաշրջանային կայունության պահպանման և հումանիտար ճգնաժամերի հետևանքների վերացման ուղղությամբ ջանքերը կշարունակվեն։
Թուրքիայի ԱԱԽ-ն նաև նշում է, որ Հունաստանի հետ հարաբերություններում վերջին շրջանում տիրող դրական մթնոլորտի պահպանումը ձեռնտու կլինի երկու կողմերին և ողջ տարածաշրջանին։
«Թուրքիան ուշադրությամբ հետևում է իրավիճակի զարգացմանը Էգեյան ծովում և Արևելյան Միջերկրական ծովի ջրերում»,-ասվում է հայտարարության մեջ։
Էմմա Չոբանյան
