«Հայաստանը ժողովրդավարության քողի տակ ագրեսիվ քաղաքականություն է վարում»․ Բաքուն արձագանքել է Նիկոլ Փաշինյանին

Ադրբեջանի ԱԳՆ-ն արձագանքել է ՀՀ վարչապետ Նիկոլ Փաշինյանի՝ այսօր Կառավարության նիստում արված դիտարկումներին, ինչպես միշտ՝ իրականության հետ աղերս չունեցող քարոզչական թեզերով։ Ադրբեջանի ԱԳՆ խոսնակ Այխան Հաջիզադեն հայտարարել է, թե Հայաստանի վարչապետը, իբր, սխալ է մեկնաբանում ՄԱԿ-ի Արդարադատության միջազգային դատարանի որոշումը, որը փաստել էր Ադրբեջանի կողմից Լաչինի միջանցքի փակումը։

«Տարածաշրջանում իրավիճակը մանիպուլացնելու՝ Հայաստանի վարչապետ Նիկոլ Փաշինյանի հերթական փորձերն անընդունելի են։ Գաղտնիք չէ, որ Հայաստանը ժողովրդավարության քողի տակ շարունակում է իր ագրեսիվ գործունեությունը»,- ասվում է Հաջիզադեի հայտարարության մեջ։

Բացի այդ, ադրբեջանական կողմը շարունակել է անհիմն մեղադրանքները, թե Հայաստանը բանակ ու զինված ուժեր է պահում Արցախում, իբր, ռազմական տեխնիկա, զինամթերք, ականներ է տեղափոխում, որոնց կանխման համար «Ադրբեջանը գործողություններ է ձեռնարկում»։

Հավելենք, որ Հաագայի դատարանում Բաքուն այդպես էլ չկարողացավ սեփական քարոզչական թեզերն ապացուցել, որ Հայաստանը զինամթերք և ականներ է տեղափոխում Արցախ։

Ադրբեջանը, որի ռազմաքաղաքական ղեկավարությունն ամենօրյա ռեժիմով սպառնում է Հայաստանին ու Արցախին, Երևանին մեղադրում է ագրեսիվ  հռետորաբանության մեջ։

Ավելին, Բաքուն նաև պնդում է, թե ադրբեջանական զորքերը, իբր, երբևէ ռազմական հանացագործություններ չեն իրականացրել, քաղաքացիական օբյեկտներին հարվածներ չեն հասցրել։ Նշենք, սակայն, որ Ադրբեջանի ռազմական հանցագործությունները փաստագրված են ոչ միայն Հայաստանի, այլև միջազգային իրավապաշտպան կառույցների կողմից։ Երևանն արդեն դիմել է նաև միջազգային ատյաններ՝ Բաքվին պատասխանատվության կանչելու համար։

Էմմա Չոբանյան