ԱՄՆ-ը Ռուսաստանին մեղադրել է ռազմավարական հարձակողական սպառազինությունների վերաբերյալ պայմանագիրը խախտելու մեջ

ԱՄՆ-ը Ռուսաստանին մեղադրել է «Ռազմավարական հարձակողական սպառազինությունների կրճատման և սահմանափակման մասին» պայմանագիրը (New START-3) խախտելու մեջ՝ միաժամանակ ընդգծելով դրա կարևորությունը համաշխարհային խաղաղության և միջազգային անվտանգության պահպանման համար, փոխանցում է VOA-ն։

«Մենք կարծում ենք, որ ՌԴ-ն արդեն խախտում է New START-3-ը, սակայն ԱՄՆ-ը կշարունակի գնահատել հետագա քայլերը ՌԴ-ի կողմից New START-3-ին չհետևելու կապակցությամբ։ Մենք դիտարկում ենք լրացուցիչ հակաքայլեր, որոնք կախված կլինեն մեր ազգային անվտանգության վրա Ռուսաստանի խախտումների հետևանքներից և հիմնված կլինեն Ռուսաստանին պայմանագրին հետ վերադարձնելու մեր ռազմավարության վրա»,- հայտարարել է Պետքարտուղարության ներկայացուցիչ Վեդանտ Պատելը։

Ավելի վաղ ՌԴ նախագահ Վլադիմիր Պուտինը կասեցրել էր Ռուսաստանի մասնակցությունը պայմանագրին։ Այնուամենայնիվ, Պատելն ասել է, որ պետք է հիշել, որ այս պայմանագիրը «մեծ նշանակություն ունի մեզ համար»:

«Մենք կարծում ենք, որ այն ապահովում և ամրապնդում է ոչ միայն Միացյալ Նահանգների, այլև ամբողջ աշխարհի, այդ թվում՝ Ռուսաստանի անվտանգությունը։ Այդ իսկ պատճառով մենք կշարունակենք անել հնարավորը, որպեսզի բոլոր կողմերը վերադառնան համաձայնագրի կատարմանը»,- ասել է արտաքին քաղաքական գերատեսչության ներկայացուցիչը։

Պատելը հավելել է, որ մինչ այժմ ԱՄՆ-ը «ոչ մի նշան չի տեսել, որ Ռուսաստանը մտադիր է փոխել կամ գերազանցել պայմանագրով սահմանված մարտագլխիկների քանակի սահմանները»։

Տաթև Ֆռանգյան