«Առողջ, ներգրավված, գիտակից երիտասարդներ ունենալուն ենք փորձում հասնել»․ ՏԵՍԱՆՅՈւԹ

Երևանում մեկնարկել է «Քաղաքացիական կրթություն և մասնակցություն» ծրագրի շահակիցների խմբի առաջին աշխատաժողովը։ ԱՄՆ ՄԶԳ կողմից ֆինանսավորվող «Քաղաքացիական կրթություն և մասնակցություն» հնգամյա (2022-2027) ծրագիրը ներառում է խնդիրների լայն շրջանակ, առաջարկում է հանրային կյանքում երիտասարդների մասնակցությունը խթանելու նորարարական լուծումներ։

Ակնկալվում է, որ այն կբարելավի Հայաստանում դպրոցական և արտադպրոցական քաղաքացիական կրթության որակն ու կընդլայնի դրա ազդեցության շրջանակը, որպես հանրային կյանքում երիտասարդների ներգրավվածության խթանման միջոց՝ աջակցելու Հայաստանում ժողովրդավարական հասարակության ուժեղացմանը։

Ծրագիրն իրականացնում է «Փրոջեքթ Հարմոնի Հայաստանի» գլխավորած կոնսորցիումը՝ «Մարդկային զարգացման միջազգային կենտրոնի», «Ժողովրդավարական կրթության հայկական կենտրոն – ՍԻՎԻՏԱՍ»-ի, «Կրթական տեխնոլոգիաների ազգային կենտրոն» ՊՈԱԿ-ի անդամակցությամբ։

Ծրագրի հիմնական գործընկերն է ՀՀ Կրթության, գիտության, մշակույթի և սպորտի նախարարությունը։ Համաժողովին հրավիրված են ՀՀ ԿԳՄՍ նախարար Ժաննա Անդրեասյանը, փոխնախարարներ Արթուր Մարտիրոսյանը և Արաքսյա Սվաջյանը, ԱՄՆ Միջազգային զարգացման գործակալության (ԱՄՆ ՄԶԳ) Ժողովրդավարության և կառավարման գրասենյակի տնօրեն Քելլի Սթրիքլենդը, այլ միջազգային և տեղական գործընկերներ։

««Քաղաքացիական կրթությունը» ժողովրդավարության անբաժան մասն է»,-  համաժողովի ընթացքում ընդգծեց ժողովրդավարության և կառավարման գրասենյակի տնօրեն Քելլի Սթրիքլենդը։ Նրա խոսքով՝ ծրագրի հենքը երիտասարդության դրական զարգացման գաղափարախոսությունն է։

Ծրագրի առաջին բաղադրիչը թիրախավորում է ֆորմալ հանրակրթությունը՝ դպրոցականներին, երկրորդը՝ 18-29 տարեկան երիտասարդներին և ավելի շատ փորձում է նպաստել հանրային կյանքում նրանց մասնակցությանը։

«Մեր տեսլականը առողջ ներգրավված արդյունավետ գիտակից երիտասարդն է, մեր գործողություններով մենք փորձում ենք այդպիսի երիտասարդ ձևավորել»,- ընդգծեց «Փրոջեքթ Հարմոնի Հայաստանի»-ի տնօրեն Մարիամ Մարտիրոսյանը։

Մանրամասները՝ տեսանյութում։