Քաղաքականություն
29.03.2023 | 16:41
Ռոսսելխոզնադզորը կարող է դիտարկել Հայաստանից կաթնամթերքի մատակարարման սահմանափակումներ սահմանելու հնարավորությունը։ Այս մասին ասված է ռուսական գերատեսչության հաղորդագրության մեջ։
«Ռոսսելխոզնադզորն առաջարկել է ՀՀ սննդամթերքի անվտանգության տեսչական մարմնին մինչև մարտի 31-ը քննարկել Հայաստանից Ռուսաստան այլ արտադրողների կաթնամթերքի հետագա մատակարարման հնարավորությունը։ Խորհրդակցությունների արդյունքներով կդիտարկվի Հայաստանի Հանրապետության կաթ վերամշակող բոլոր ձեռնարկություններից կաթնամթերքի մատակարարման սահմանափակումներ մտցնելու հարցը»,- հայտնել են գերատեսչությունից։
Ռոսսելխոզնադզորում նշել են, որ նկատում են Հայաստանից ռուսական շուկա կաթնամթերքի մատակարարման աճ։ Հայկական կողմից ստացված նախնական տեղեկությունների համաձայն՝ Հայաստանի կաթ վերամշակող ձեռնարկություններն օգտագործում են Իրանի Իսլամական Հանրապետության ձեռնարկությունների արտադրած հումքը, որոնց նկատմամբ Ռոսսելխոզնադզորը սահմանափակող միջոցներ է կիրառել։
Նշվում է, որ 2023 թվականի մարտի 20-ից 24-ն ընկած ժամանակահատվածում Ռոսսելխոզնադզորի կողմից իրականացված ստուգումների ընթացքում սույն փաստը հաստատվել է։
Տաթև Ֆռանգյան
