Լաչինի միջանցքի ռեժիմը վերաբանակցել չենք պատրաստվում. Արարատ Միրզոյան․ ՏԵՍԱՆՅՈՒԹ

Միջազգային մեր գործընկերների հետ բանակցությունների ժամանակ խնդիր դրվո՞ւմ է, որպեսզի օր առաջ Հադրութի, Շուշիի, Մարտունու և Մարտակերտի շրջանի բռնի տեղահանվածները վերադառնան իրենց բնակության վայրեր և ընդլայնվի ռուս խաղաղապահների գործունեության տարածքը»,- «Հայաստան» խմբակցության պատգամավոր Գեղամ Նազարյանն այս հարցն ուղղեց ՀՀ արտգործնախարարին՝ միաժամանակ հետաքրքրվելով, թե մոտավոր երբ կբացվի Լաչինի միջանցքը։

«Ինչ վերաբերում է բնակության վայրեր վերադարձին, այս մասին դրույթ կա նոյեմբերի 9-ի եռակող հայտարարության 7-րդ կետում: Նշված է, որ ՄԱԿ-ի փախստականների հարցով բարձր հանձնակատարի և նրա գրասենյակի օգնությամբ պետք է կազմակերպվի բռնի տեղահանված անձանց վերադարձը: Առարկայական ձեռքբերում այս ուղղությամբ դեռևս չկա: Ադրբեջանը այս կետի հետ կապված ևս խախտում է եռակողմ հայտարարությունը»,- նշեց Միրզոյանը:

«Լաչինի միջանցքի վերաբերյալ մեր դիրքորոշումը հանրահայտ է: Մենք Լաչինի միջանցքի ռեժիմը վերաբանակցել չենք պատրաստվում. այս ռեժիմը սահմանված է նոյեմբերի 9-ի եռակողմ հայտարարությամբ և այդ հայտարարության համաձայն՝ միջանցքը՝ 5կմ-ոց տարածքը, գտնվում է ռուսական խաղաղապահ ուժերի վերահսկողության ներքո, մյուս կողմից էլ Ադրբեջանը երաշխավորում է մեքենաների անխափան տեղաշարժը՝ երկու ուղղությամբ: Մենք կարծում ենք, որ ռեժիմը սահմանված է եռակողմ հայտարարությամբ և չենք պատրաստվում ուժի գործադրման հետևանքով վերաբանակցել»,- նշեց արտգործնախարարը:

Մանրամասները՝ տեսանյութում: