«Հաց բերողի» գործով Չարչյանը կեղծ եզրակացությո՞ւն է տվել. Դատախազության մեղադրանքի հետքերով․ ՏԵՍԱՆՅՈՒԹ

Նախորդ ամիս ԱԺ-ում իշխող ուժի ձայներով անձեռնմխելիությունից զրկվեց «Հայաստան» խմբակցության պատգամավոր, «Իզմիրլյան» բժշկական կենտրոնի տնօրեն Արմեն Չարչյանը։ Միջնորդագիրը խորհրդարան բերած ՀՀ գլխավոր դատախազ Աննա Վարդապետյանը պնդում է՝ Արթուր Սարգսյանի հիվանդության վերաբերյալ Չարչյանն ակնհայտ կեղծ եզրակացություն է տվել։

Վարդապետյանի խոսքով` պատգամավորը, որպես կրկնակի բժշկական հանձնաժողովի փորձագետ, դրական եզրակացություն է տվել Սարգսյանի կալանավորմանը, սակայն կասկածյալի հիվանդությունը եղել է պատժի կրման հետ անհամատեղելի հիվանդությունների ցանկում։

Ըստ քրեական գործի նյութերի՝ հանգուցյալ Արթուր Սարգսյանը տառապել է Բեխտերևի հիվանդության ծանր աստիճանով, որն անհամատեղելի էր կալանքի հետ։ Այնինչ, փորձագիտական խումբը նրա առողջական վիճակի մասին եզրակացություն է տվել միայն բժշկական փաստաթղթերի հիման վրա և, ըստ դրա, Բեխտերևի հիվանդությունն այն աստիճանի ծանր չի եղել, որ կալանքից ազատվի։ Սարգսյանի պաշտպան Տիգրան Եգորյանի խոսքով՝ այս մասին ինքն ահազանգել է դեռ տարիներ առաջ։

Փաստաբանը հղումներ է կատարում Արմեն Չարչյանի և ՀՀ Գիտությունների ազգային ակադեմիայի «Փորձաքննությունների ազգային բյուրո» պետական ոչ առևտրային կազմակերպության փորձագետների կողմից տրված եզրահանգմանը՝ նկատելով՝ կեղծ տեղեկանքում անգամ իրար հակասող ակնառու հատվածներ կան։

Պատգամավորը նոր մեղադրանքը որակում է ակնհայտ անհիմն ու անօրինական։ Այս մասով, սակայն, նրա փոխարեն մեկնաբանում է պաշտպանը։

Իրականում պետական ո՞ր մարմնի, ո՞ր պաշտոնյայի գործողությունը կամ անգործությունն է հանգեցրել 2016 թվականին ՊՊԾ գունդը գրաված «Սասնա ծռեր» խմբավորմանը հաց տարած Արթուր Սարգսյանի մահվան։ Գլխավոր դատախազությունը «Հաց բերողի» մահվան օրը՝ 2017 թվականի մարտի 16-ին տեղեկացրել էր՝ Արթուր Սարգսյանի մահվան նախնական պատճառ է ախտորոշվել «սիրտ-թոքային անբավարարությունը»։ Հարուցվել էր քրեական գործ:

«Հաց բերողի» մահվան հաջորդ օրն իսկ Երևանում սկսվեցին բողոքի գործողություններ, իշխանության առաջ դրվեցին պահանջներ՝ պատասխանատվության ենթարկել մեղավորներին։ Հնչում էին արդարադատության նախարար Արփինե Հովհաննիսյանի, գլխավոր դատախազ Արթուր Դավթյանի անունները, որոնք մերժում էին իրենց կապը Արթուր Սարգսյանի մահվան հետ։

«Հաց բերողի» մահվան շուրջ «ինչու»-ների պատասխանը տվել է դեռևս ընդդիմադիր պատգամավոր Նիկոլ Փաշինյանը։ 2017-ի հուլիսի 10-ին Ազգային ժողովի ամբիոնից նա չորս դրվագով, իր խոսքով՝ «քուանշ» հայտարարեց այդ ժամանակ գլխավոր դատախազի պաշտոնը զբաղեցնող Արթուր Դավթյանին․ դրվագներից մեկը հենց «Հաց բերողի» մահվան հանգամանքն էր։

Ընդդիմադիր Փաշինյանը, սակայն, իշխանության գալով, կարծես թե շատ արագ մոռացավ իր «քուանշները», ավելին՝ Դավթյանը պաշտոնավարեց մինչև իր ժամկետի ավարտը։

Արթուր Սարգսյանի մահվան մասով փորձաքննությունների ավարտը եղավ դեռևս 2019 թվականին, սակայն քրեական գործը կրկին արթնացնելու որևէ փորձ չեղավ Նիկոլ Փաշինյանի իշխանության 5 տարիների ընթացքում։

Իրավապաշտպան Նինա Կարապետյանցը Չարչյանին անձեռնմխելիությունից զրկելու և քրեական գործին նոր թափ տալու գործընթացը հերթական շոու է որակում։ Ընդգծում է՝ միայն Չարչյանը և փորձագետները չէ, որ պետք է հայտնվեին ամբաստանյալի աթոռին։

Մանրամասները՝ տեսանյութում։

Ռոզա Վարդանյան