Ե՞րբ կվերանորոգվեն Գյումրիի ամենամեծ թաղամասի քարուքանդ փողոցները․ քաղաքապետի պարզաբանումը

Գյումրիի ամենամեծ բնակելի թաղամասի՝ Անիի փողոցները շարունակում են մնալ քարուքանդ վիճակում։ Հորդառատ անձրևների ժամանակ դրանք լցվում եմ ցեխաջրերով՝ դառնալով անանցանելի։ Բնակիչները շարունակում են բողոքել, սակայն քաղաքային իշխանությունները հայտնում են, որ փողոցաշինության առումով դեռ նորություններ չկան։

Գյումրիի համայնքապետարանը շարունակում է բանակցել Վերակառուցման և զարգացման բանկի՝ ՎԶԲ հետ, այս թաղամասի համար նախատեսված փողոցային լուսավորության ծրագիրը վերափոխելու ու այդ գումարը փողոցների հիմանորոգմանն ուղղելու համար։

Քաղաքապետ Վարդգես Սամսոնյանի պարզաբանմամբ՝ Անի թաղամասի փողոցները ասֆալտապատելու նպատակով իրենք հրավիրել են փորձագետների, որոնք ուսումնասիրություններ կատարելով՝ արձանագրել են, որ 16 կիլոմետր՝ մոտավորապես 190 հազար քառակուսի մետր տարածք է ասֆալտապատման ենթակա։
«Հիմա ֆինանսների նախարարության մասնակցությամբ բանկի հետ քննարկումներ ենք անցկացնում, մեզ այդ ծրագրով գումար էր տրամադրվել լուսավորության համար, սակայն մենք ավելի նպատակահարմար գտանք Անի թաղամասի փողոցները հիմնանորոգել։

Հաշվարկը կա, ունենք տնտեսումներԱ և Բ Տրանշից, կա բանկով հատկացված գումարը, բայց տարբերություն է տալիս, մեր ունեցած գումարը պակասում է այդ ամբողջ ծրագիրն իրականացնելու։ Հիմա քննարկում ենք՝ այդ միջոցները կբավարարե՞ն, կկարողանա՞նք հաստատել տալ բանկի կողմից, թե՞ մենք այդ տարբերության չափով մի կամ մի քանի փողոց հանենք, հաջորդ տարի սուբվենցիոն կամ այլ ծրագրով իրականացնենք։ Որ Անի թաղամասը պետք է ասֆալտապատվի, դա միանշանակ է»,-ասաց Վարդգես Սամսոնյանը։

Վերջինս տեղեկացրեց, որ նախնական քննարկմամբ ՎԶԲ-ն համաձայնել է լուսավորության փոխարեն Անի թաղամասի փողոցներն ասֆալտապատել, հիմա նոր քննարկումների փուլում են՝ կապված գումարի պակասորդի հետ։ Ըստ նրա, եթե վերջնական համաձայնության գան, փաստաթղթերը ձևակերպեն, կքննարկեն Անի թաղամասի փողոցների հիմնանորոգումը սկսելու հարցը։

Քաղաքապետն ասում է՝ թե՛ Անի թաղամասում և թե՛ ողջ քաղաքի տարածքում խճապատման աշխատանքներ են իրականացնում՝ ժամանակավոր լուծում տալով։ Ըստ Վարդգես Սամսոնյանի՝ այս տարի իրականացնում են 29 փողոցների վերանորոգման սուբվենցիոն ծրագիրը։ Այդ փողոցները քաղաքի տարբեր հատվածներում են։ Դրանք բարեկարգվելուց բացի նաև կլուսավորվեն։

Արմիկ Մովսիսյան