26.04.2026 | 21:21
Իրավիճակը Մալիում․ մահացել է պաշտպանության նախարարը, երկրում թեժ մարտեր են
Թուրքիան Հյուսիսային Իրաքում ստեղծել է 11 ռազմաբազա
Քաղաքականություն
21.06.2018 | 18:33
Թուրքիայի վարչապետ Բինալի Յըլդըրըմը թուրքական «ATV» և «A-Haber» լրատվամիջոցների հետ զրույցում խոսել է թուրք-ամերիկյան լարված հարաբերությունների, Հյուսիսային Իրաքի Քանդիլ շրջանում «Քուրդիստանի բանվորական կուսակցության» (ՔԲԿ-PKK) զինյալների դեմ իրականացվող ռազմական գործողությունների մասին. փոխանցում է ermenihaber-ը:
Թուրքիայի վարչապետի խոսքերով, ԱՄՆ-ի նկատմամբ թուրք բնակչության վստահությունը նվազել է։ Ըստ Յըլդըրըմի ՝ դրա մասին են վկայում բնակչության շրջանում անցկացված սոցհարցումները։
«Մեր հասարակությունը հիասթափված է ԱՄՆ-ից։ Վերջինիս նկատմամբ վստահությունը 20 տոկոսից էլ պակաս է։ Հարաբերությունները կարգավորելու համար ոչ թե մենք պետք է քայլեր ձեռնարկենք, այլ ԱՄՆ-ը»,-ասել է Յըլդըրըմը։
Վերջինս գոհ է, որ Թուրքիան և ԱՄՆ-ն գոնե կարողացան որոշակի համաձայնության հասնել Մանբիչ քաղաքի վերաբերյալ, որը առայժմ Սիրիայի քրդական ուժերի վերահսկողության տակ է, իսկ վերջիններիս պաշտոնական Անկարան ահաբեկչական է որակում։
Անդրադառնալով Հյուսիսային Իրաքում քուրդ զինյալների դեմ իրականացվող ռազմական գործողություններին` Յըլդըրըմը ասել է, որ Հյուսիսային Իրաքում 400 կմ տարածք արդեն մաքրվել է քուրդ զինյալներից։ Նա տեղեկացրել է, որ այս պահի դրությամբ Թուրքիայի զինված ուժերը Հյուսիսային Իրաքում ստեղծել են 11 ռազմաբազա։
Հիշեցնենք, որ ըստ թուրքական կողմի` ԱՄՆ-ն և Թուրքիան պայմանավորվել էին, որ քրդերը դուրս են գալու Մանբիչից, իսկ ԻՊ-ի դեմ պայքարելու համար վերջիններիս տրամադրված զինամթերքը hետ է վերցվելու նրանցից:
