06.06.2026 | 19:42
«10 հոգի գալում ենք միտինգի». նոր գաղտնալսում ընտրակաշառքի գործով
Ենթադրյալ հանցագործության ապացույցները և հետքերն են ոչնչացնում. Արթուր Սաքունց. ՏԵՍԱՆՅՈՒԹ
Հասարակություն
09.03.2023 | 15:13
«Պետական գաղտնիքի մասին» օրենքը չի համապատասխանում ժողովրդավարական պետության սկզբունքներին՝ մի քանի առումներով։ Այս մասին այսօր «Չարաշահումների ռիսկեր՝ «Պետական գաղտնիքի մասին» օրենքում» թեմայով քննարկման ժամանակ հայտարարեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը։
«Ընդհանրապես այս օրենքի տրամաբանությունը հիմնված չէ տեղեկատվության ազատության և տեղեկատվության ազատության սահմանափակումների հիմնավորվածության վրա: Այդ սահմանափակումները նշանակում են, որ կարծիքի կամ տեղեկատվության ազատությունը կարող է սահմանափակվել միմիայն, եթե դա անհրաժեշտ է ժողովրդավարական պետության անվտանգության, այլ անձանց անձնական տվյալների պաշտպանության և մի շարք այլ դեպքերում: Կոնվենցիայի 10-րդ հոդվածի 2-րդ մասը հստակ է սահմանում մոտեցումները:
Մյուս կարևոր մասը, որ չի համապատասխանում. ժողովրդավարական պետությունում պետք է լինի արդյունավետ վերահսկողություն պետական բոլոր մարմինների գործունեության նկատմամբ: Ինչ է նշանակում վերահսկողություն. պետական մարմնի կողմից իր լիազորությունների չարաշահումները կանխող, բացահայտող մեխանիզմներ պետք է լինեն, այդ թվում՝ նաև անվտանգության բնագավառում գործող կառույցների նկատմամբ:
Դրանց նկատմամբ պետք է լինի արդյունավետ պառլամենտական վերահսկողություն և քաղաքացիական հասարակության արդյունավետ վերահսկողություն, հակառակ դեպքում՝ մենք գործ կունենանք մի իրավիճակի հետ, երբ գոյություն կունենա բացարձակապես անվերահսկելի, ոչ հաշվետու և ոչ թափանցիկ պետական կառույց։ Եվ ի վերջո գործ կունենանք խորքային պետության ինստիտուտի հետ, որը ռիսկ է ժողովրդավարական պետության անվտանգության համար»,- նշեց Սաքունցը:
Հանրությունն ունի՞ վստահություն, որ անվտանգության ծառայությունները գործել են, գործում են և գործելու են իրավաչափ և համաչափ։ Սաքունցի դիտարկմամբ՝ չունի, որովհետև բազմաթիվ փաստեր կան, որ ծառայությունն օգտագործվել է որպես միջոց քաղաքական այլախոհների դեմ ապօրինի գործողություններ կատարելու մեջ։
«Այդ գործողությունների վերաբերյալ փաստաթղթերը չպետք է լինեն գաղտնի․․․ Եթե մնան գաղտնի և ոչնչացվեն, կնաշանակի, որ խախտումները կմնան չբացահայտված և անպատժելի, իսկ կառույցի վարքագիծը՝ անվերահսկելի։
Արխիվների ոչնչացումը նշանակում է ենթադրյալ հանցագործության ապացույցների և հետքերի ոչնչացում,- նշեց իրավապաշտպանը։
Մանրամասները՝ տեսանյութում։
