Էական հակասություն կա այս դրույթի հետ․ ես ծանոթացել եմ ԳՇ գաղտնի փաստաթղթին․ Մանուկյան. ՏԵՍԱՆՅՈՒԹ

ԱԺ պաշտպանության և անվտանգության հարցերի մշտական հանձնաժողովի նիստում քննարկվում է «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություն կատարելու մասին նախագիծը, որի ընդունման արդյունքում, բացառությամբ ԱԱԾ տնօրենի և նրա տեղակալների, բոլոր ծառայողները ատեստավորում կանցնեն։

Նախագծի համաձայն՝ 2 անգամ ատեստավորում չանցած ԱԱԾ ծառայողին կառաջարկվի այլ պաշտոն, որից հրաժարվելու դեպքում աշխատակիցը կարձակվի ծառայությունից։

«Ատեստավորումը մասնագիտական համապատասխանելիության որոշման հա՞րց է, թե՞ փող ավելացնելու։ Զինված ուժերում ատեստավորման համակարգի ներդրման ժամանակ ևս ամբողջ վեճը դրանով էր պայմանավորված,- նշեց «Հայաստան» խմբակցության պատգամավոր Գեղամ Մանուկյանը,- ԶՈւ-ում մարդն ատեստավորում է անցնում, որ աշխատավարձը բարձրանա, բայց երբ որ չի անցնում, այսինքն՝ երբ որ պարզվում է, որ չի համապատասխանում իր զբաղեցրած պաշտոնին, դրան հետևանք չի լինում։ Իսկ ԱԱԾ-ում այդ համակարգի ներդրման արդյունքում, նախատեսվում է, որ դա ունենալու է հետևանք»։

Մանուկյանը հավելեց, որ ներկայացված նախագծի հիմնավորան մեջ նշված է․ «ԱԱԾ սահմանապահ զորքերում անհրաժեշտ է իրականացնել բարեփոխումներ, այդ թվում՝ սահմանապահ զորքերի անձնակազմի թվի ավելացում՝ հաշվի առնելով այն հանգամանքը, որ ԱԱԾ սահմանապահ զորքերը փուլային տարբերակով ՊՆ-ից ընդունելու են հայ-ադրբեջանական պետական ամբողջ սահմանի պահպանությունը»։ Ընդդիմադիր պատգամավորի կարծիքով՝ սա իրականությանը չի համապատասխանում։

Մանուկյանը հայտնեց, որ օրերս ԶՈՒ գլխավոր շտաբում ծանոթացել է և ԶՈՒ պլանին և սպառազինությունների ձեռքբերման 2023-27 թթ․ ծրագրին և նշեց․ «Քանի որ գաղտնի փաստաթուղթ է, որևէ բան չեմ կարող ասել, բայց այդ պլանի և վերոնշյալ դրույթի մեջ կա էական հակասություն»։

Մանրամասները՝ տեսանյութում։