01.11.2024 | 19:22
Գյումրիի ավագանու «Բալասանյան դաշինքը» 13 թափուր մանդատ ունի, 1 թեկնածու մանդատ է վերցրել
Ռուսական գազը փոխարինել իրանականով․ մի՞ֆ, թե՞ իրական հնարավորություն․ ՏԵՍԱՆՅՈՒԹ
Քաղաքականություն
22.02.2023 | 20:50
Պայմանավորվածություններ կան Իրանից Հայաստան գազի ներկրման ծավալներն ավելացնելու վերաբերյալ։ Ազգային ժողովում հնչած այս հայտարարությունը ոգևորության ու շահարկումների առիթ է դարձել։
Իսկ Իրանում տեղյա՞կ են, որ նման պայմանավորվածություն կա։ Իրանագետ Գարիկ Միսակյանը բացատրում է, որ եթե Թեհրանում այդպիսի որոշում լինի, այն լինելու է ոչ թե տնտեսական, այլ քաղաքական հիմնավորումներով։
Ազգային ժողովի հանձնաժողովում նշված քննարկման ժամանակ ՏԿԵ նախարարի ոլորտային տեղակալ Հակոբ Վարդանյանը նշում է, որ տարիներ շարունակ Հայաստանն Իրանից ներկրել է գրեթե նույն ծավալի գազ, և ծավալների ավելացման համար այս պահին խոչընդոտներ կան։
Հայկական կողմը, ըստ փոխնախարարի, առաջարկել է ավելի շատ գազ ներկրնել Իրանից, բայց Թեհրանը պայման է դրել։
«Մենք այս պահի դրությամբ ունենք հնարավորություն գործող գծերի թողունակության պայմաններում ևս գազի քանակը որոշակի առումով ավելացնելու։ Դրա համար մինչև գծի պատրաստ լինելը անպայման ուզում ենք պայմանագրի փոփոխությունները ստորագրվեն, և հնարավորություն կունենանք ավելացնելու։ 2014 թվականից ի վեր որոշակի պայմանավորվածություն է ձեռք բերվել, որ մինչև գործակցի հարցը չվերջնականացվի, հին գործակիցներով իրանական կողմն անհամաձայնություն է հայտնել ավելի մեծ ծավալներով փոխանակում իրականացնել», – նշում է Վարդանյանը։
Ռուսական գազն իրանականով փոխարինելու խոսակցությունը վերջին օրերին ակտիվացավ այն բանից հետո, երբ նախորդ շաբաթ հերթական անգամ դադարեցվեց ռուսական գազի մատակարարումը Հայաստան։ Ռուսական կողմի պնդմամբ՝ դա վթարի հետևանք էր, իսկ մատակարարումը կարճ ժամանակ անց վերականգնվեց։ Տնտեսագետ Սուրեն Պարսյանը բացատրում է՝ իրանական գազի՝ ավելի էժան լինելու վերաբերյալ որևէ հաշվարկ մինչև հիմա չի ներկայացվել։
Պարսյանը նշում է, որ իրանական կողմի հետ հավելյալ բանակցությունները, և բարտերի փոխարեն գումարի դիմաց գնումները, միգուցե, ավելի էժան դարձնեն իրանական գազը։ Բայց ՏԿԵ նախարարի տեղակալը, որը զբաղվում է այդ հարցով, նշում է՝ մինչև հիմա այդպես չի եղել։
«Իրանական գազի ներքին սպառման համար օգտագործելուն ես ուղղակի կարճ անդրադառնամ, որ քանի անգամ, որ մենք իրանցիների հետ քննարկել ենք ուղիղ գազի գնման հնարավորությունները, ինքը ավելի մատչելի չի եղել, քան այդ պահին գործող ռուսական գազի գինը», – նույնը հաստատում է ՏԿԵ փոխնախարարը։
Մանրամասները՝ տեսանյութում։
Գարիկ Հարությունյան
