ՌԴ-ում ռազմական բժշկին մեղադրանք է առաջադրվել ռազմական գործողություններին մասնակցելուց հրաժարվելու համար

ՌԴ Քննչական կոմիտեն քրգործ է հարուցել Քրեական օրենսգրքի 332-րդ հոդվածի 2.1 մասով (ռազմական դրության, պատերազմի կամ զինված բախումների կամ մարտական գործողությունների ժամանակ հրամանը չկատարելը) ռազմական բժիշկ Դենիս Վասիլևի նկատմամբ, որը հրաժարվել է մասնակցել Ուկրաինայում ռազմական գործողություններին։ Այս մասին իր Telegram ալիքում հայտնել է փաստաբան Պավել Չիկովը:

Այս հոդվածով Վասիլևին սպառնում է մինչև երեք տարի, իսկ եթե մերժումը հանգեցրել է ծանր հետևանքների՝ մինչև տասը տարի ժամկետով ազատազրկում։

Վասիլևը սովորել է ռազմաբժշկական ակադեմիայում։ 2022 թվականին նա ավարտել է բժշկական ծառայության լեյտենանտի կոչումով և ամառվանից ծառայել Հյուսիսային նավատորմի զորամասերից մեկում, գրում է Չիկովը։ Բաշխումից հետո նա հրաժարականի դիմում է ներկայացրել և սեպտեմբերին ներկայացվել վաղաժամկետ ազատման, սակայն նույն ամսին Ռուսաստանում մասնակի մոբիլիզացիա է հայտարարվել։

Ըստ Չիկովի՝ Հյուսիսային նավատորմի բժշկական ծառայության ղեկավարության առաջարկով սպան որոշել է տեղափոխվել Սառուցյալ օվկիանոսում գտնվող «Ֆրանց Յոզեֆի երկիր»։ Սակայն մինչ տեղափոխման հրամանը ստանալը զորամասին մեկ այլ հրաման է եկել՝ մեկնել մարտական գոտի։ Բժիշկը հրաժարվել է այն կատարել անձնական նկատառումներով։

Հիշեցնենք, որ այս հոդվածը ՌԴ Քրեական օրենսգրքում հայտնվել է սեպտեմբերին։ Միևնույն ժամանակ, նախագահ Վլադիմիր Պուտինը հավանություն է տվել փոփոխություններին, որոնք խստացնում են պատիժը ռազմական ստորաբաժանումը չարտոնված լքելու համար (Քրեական օրենսգրքի 337-րդ հոդված՝ հինգից մինչև տասը տարվա ազատազրկում): Քրեական օրենսգրքում հայտնվել են նաև կամավոր հանձնման (հոդված 352.1, դավաճանության նշանների բացակայության դեպքում երեքից տասը տարի ազատազրկում) և կողոպուտի (հոդ. 356.1, մինչև 15 տարի) հոդվածները։

Տաթև Ֆռանգյան