Լեհաստանը ՆԱՏՕ-ից Ուկրաինայի անվտանգության երաշխիքներ է պահանջում

Լեհաստանի նախագահ Անջեյ Դուդան ՆԱՏՕ-ի երկրներին կոչ է արել Ուկրաինային անվտանգության հետպատերազմյան երաշխիքներ տրամադրել։ Այս մասին նա հայտարարել է ԱՄՆ նախագահ Ջո Բայդենի Վարշավա այցի նախօրեին Financial Times-ին տված հարցազրույցում, փոխանցում է DW-ի ռուսական ծառայությունը։

Դուդայի խոսքով՝ անվտանգության երաշխիքների խոստումները «կարևոր կլինեն» Ուկրաինայի և նրա զինվորների բարոյական ոգու համար՝ առաջացնելով «զգացմունք, որ ՆԱՏՕ-ն աջակցում է նրանց»։

Լեհաստանի նախագահը նաև կոչ է արել Սպիտակ տան ղեկավարին Վարշավա կատարած այցի ժամանակ «շատ կոշտ արտահայտություններով» հաստատել, որ ԱՄՆ-ն անվերապահորեն աջակցում է ՆԱՏՕ-ի Հավաքական պաշտպանության պայմանագրի 5-րդ հոդվածը, ըստ որի՝ դաշինքի անդամ պետության վրա ցանկացած հարձակում համարվում է հարձակում դաշինքի բոլոր անդամների վրա, գրում է Financial Times-ը։

Անվտանգության երաշխիքները, որոնք փնտրում է Կիևը, կարող է ունենալ այնպիսի կառուցվանք, որը կպարտադրի ՆԱՏՕ-ի առաջատար տերություններին, ինչպիսիք են ԱՄՆ-ը, Մեծ Բրիտանիան և Ֆրանսիան, ռազմական օգնություն ցուցաբերել Ուկրաինայի վրա ապագա հարձակման դեպքում, նշում է պարբերականը։

ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը, որը նախագահ Վլադիմիր Զելենսկու աշխատակազմի ղեկավար Անդրեյ Երմակի հետ միասին հանդես է եկել Ուկրաինայի հետպատերազմյան անվտանգության վերաբերյալ պաշտոնական առաջարկով, նման երաշխիքները համեմատել է ԱՄՆ-ի կողմից Իսրայելին տրվածի հետ։

Մյունխենում անվտանգության համաժողովի ժամանակ ԱՄՆ-ի և Գերմանիայի պաշտոնյաները թերագնահատել են  Ուկրաինայի անվտանգության երաշխիքների անհրաժեշտությունն այս փուլում՝ պնդելով, որ Արևմուտքի ռազմական աջակցությունն այն երաշխիքն է, որն անհրաժեշտ է Կիևին, գրում է Financial Times-ը: Սակայն Ուկրաինան պնդում է, որ իրեն անհրաժեշտ են ռազմական աջակցության ավելի պարտավորեցնող երաշխիքներ:

Տաթև Ֆռանգյան