27.06.2026 | 11:42
Ուկրաինան հրթիռային հարված է հասցրել «Օրեշնիկ» արտադրող գործարանին
Բլինքենն ասել է, որ ԱՄՆ-ը «գնահատում է դրական քայլերը, որ Թուրքիան ձեռնարկում է Հայաստանի հետ հարաբերությունների բարելավման համար»
Քաղաքականություն
20.02.2023 | 13:57
Թուրքիայում գտնվող ԱՄՆ պետքարտուղար Էնթոնի Բլիքենն այսօր իր թուրք գործընկեր Մևլութ Չավուշօղլուի հետ մամուլի ասուլիսում նշել է, որ Թուրքիան ՆԱՏՕ-ի կարևոր դաշնակից է՝ միաժամանակ ընդգծելով, որ Վաշինգտոնը վճռականորեն աջակցում է Դաշինքին Շվեդիայի և Ֆինլանդիայի արագ անդամակցելուն։
«Միացյալ Նահանգները հզոր աջակցություն է ցուցաբերում Սկանդինավյան երկրների՝ ՆԱՏՕ-ին հնարավորինս արագ անդամակցելուն։ ՆԱՏՕ-ի ընդլայնումը երկկողմանի խնդիր չէ»,- ասել է Բլինքենը։
Նա նշել է, որ Թուրքիան և ԱՄՆ-ը նաև համագործակցում են համաշխարհային ահաբեկչության դեմ պայքարում ու Բալկաններում և Հարավային Կովկասում խաղաղության հաստատման հարցում։
«Մենք գնահատում ենք դրական քայլերը, որ Թուրքիան ձեռնարկում է՝ բարելավելու հարաբերությունները Հայաստանի և Հունաստանի, ինչպես նաև Իսրայելի հետ, որոնց քաղաքացիներն աշխատել են թուրք գործընկերների հետ կողք կողքի՝ աղետի հետևանքները վերացնելու համար»,- ասել է ԱՄՆ պետքարտուղարը։
Հավելենք, որ Չավուշօղլուն իր հերթին ասել էր, որ ԱՄՆ պետքարտուղարի հետ քննարկել է նաև իրավիճակը Հարավային Կովկասում։
Էմմա Չոբանյան
