25.11.2024 | 09:31
Փակ է «Ամբերդ»-ից Քարի լիճ տանող ճանապարհը
Ժամանակն է, որ Թուրքիան վավերացնի Շվեդիայի և Ֆինլանդիայի՝ ՆԱՏՕ-ին միանալու հայտերը․ Ստոլտենբերգը՝ Չավուշօղլուին
Քաղաքականություն
16.02.2023 | 17:55
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ «ժամանակն է, որ Թուրքիան վավերացնի Ֆինլանդիայի և Շվեդիայի կողմից պաշտպանական դաշինքին միանալու հայտերը»: Reuters-ի փոխանցմամբ՝ այս մասին Ստոլտենբերգն ասել է Անկարայում Թուրքիայի ԱԳ նախարար Մևլութ Չավուշօղլուի հետ մամուլի ասուլիսում։
Թուրքիան լայնորեն դիտարկվում է որպես այս հարցում հիմնական խոչընդոտ, քանի որ նախագահ Թայիփ Էրդողանը նշել է, որ իր երկիրը կարող է վավերացնել Ֆինլանդիայի դիմումը, մինչդեռ Շվեդիայի դիմումը՝ ոչ։ Թուրքիան ասում է, որ Շվեդիան ապաստան է Քուրդիստանի աշխատավորական կուսակցության (PKK) անդամների համար։
Անցյալ ամիս Թուրքիան դադարեցրել է Շվեդիայի և Ֆինլանդիայի հետ նրանց հայտերի շուրջ բանակցությունները՝ այն բանից հետո, երբ դանիացի ծայրահեղ աջ քաղաքական կուսակցության առաջնորդ Ռասմուս Փալուդանը Ստոկհոլմում Թուրքիայի դեսպանատան մոտ այրել էր Ղուրանի պատճենը:
Ստոլտենբերգը Ղուրանի այրման բողոքի ակցիան որակել է որպես «խայտառակ արարք» և ասել, որ Շվեդիայի կառավարությունը վճռական դիրքորոշում է ցուցաբերել բողոքի դեմ, որը պետք է գովաբանվի:
«Սա ցույց է տալիս, որ Շվեդիան և Ֆինլանդիան հասկանում և իրականացնում են քաղաքականություն, որն ընդունում է Թուրքիայի արտահայտած մտահոգությունները: Եվ սա է պատճառը, որ ես կարծում եմ, որ եկել է վավերացման ժամանակը», – նշել է Ստոլտենբերգը։
Չավուշօղլուն էլ կրկնել է Թուրքիայի դիրքորոշումը, որ Անկարան կարող է առանձին դիտարկել ՆԱՏՕ-ին անդամակցելու Ֆինլանդիայի և Շվեդիայի հայտերը։
Ընդունելով, որ Շվեդիան փոխել է ահաբեկչության վերաբերյալ իր օրենսդրությունը՝ Թուրքիայի պահանջներին համապատասխան, Չավուշօղլուն ասել է, որ փոփոխությունները պետք է ամբողջությամբ իրականացվեն։
Ավելի ուշ Յենս Ստոլտենբերգը հանդիպել է նաև նախագահ Ռեջեփ Թայիփ Էրդողանին։
Էմմա Չոբանյան
