ՌԴ-ի դեմ պատժամիջոցներն օգնում են Անդրկովկասի և Կենտրոնական Ասիայի երկրներին․ ՎԶԵԲ

Անդրկովկասի և Կենտրոնական Ասիայի տնտեսությունները շահում են Ռուսաստանի հետ միջնորդական առևտրից։ Նրանք նաև օգուտ են քաղում բարձր որակավորում ունեցող միգրանտների հոսքից։ Այս մասին հայտնել է Վերակառուցման և զարգացման եվրոպական բանկը (ՎԶԵԲ), գրում է DW-ի ռուսական ծառայությունը:

Ուկրաինայի դեմ պատերազմի պատճառով Ռուսաստանի դեմ արևմտյան պատժամիջոցները բարենպաստ ազդեցություն են ունեցել մի շարք տարածաշրջանների տնտեսությունների վրա։

«Կովկասի և Կենտրոնական Ասիայի երկրների ազգային տնտեսությունները շահում են Ռուսաստանի հետ միջնորդական առևտուրից, կապիտալի ներհոսքից և Ռուսաստանից բարձր որակավորում ունեցող միգրանտների հոսքից»,- ասվում է Վերակառուցման և զարգացման եվրոպական բանկի (ՎԶԵԲ) հրապարակած զեկույցում։

Ուսումնասիրության մեջ նշվում է, որ այս երկրներում իրական աշխատավարձերը, ի տարբերություն այլ տարածաշրջանների, աճել են, կտրուկ աճել են ներմուծումները Եվրամիությունից, Մեծ Բրիտանիայից և ԱՄՆ-ից, ինչը վկայում է այն մասին, որ ապրանքները վերավաճառվում են Անդրկովկասի և Կենտրոնական Ասիայի տարածքով դեպի Ռուսաստան։ Սա Արևմուտքից ռուսական ներմուծման միայն փոքր մասն է, սակայն այնպիսի երկրների համար, ինչպիսիք են Ղրղզստանը և Հայաստանը, նշանակում է ՀՆԱ-ի 4-6 տոկոսի աճ:

«Մեծ լոգիստիկ արդյունաբերություն է առաջացել՝ հեշտացնելու այս առևտուրը, ինչը դյուրացնում է կապիտալի ներհոսքը, որն իր հերթին օգնում է տեղական արժույթներին արժևորվել ԱՄՆ դոլարի նկատմամբ»,- ասվում է ՎԶԵԲ-ի զեկույցում:

Տաթև Ֆռանգյան