17.12.2025 | 19:29
«Սևան ստարտափ սամմիթ»-ի հիմնադիրը ՀՀ նախագահին է ներկայացրել նոր սմարթ քաղաքի կառուցման հայեցակարգի վերաբերյալ իր տեսլականը
Վարչապետը շնորհավորական ուղերձ է հղել Լիտվայի վարչապետին
Քաղաքականություն
16.02.2023 | 13:31
Վարչապետ Նիկոլ Փաշինյանը շնորհավորական ուղերձ է հղել Լիտվայի Հանրապետության վարչապետ Ինգրիդա Շիմոնիտեին՝ ազգային տոնի առթիվ: Ուղերձում նշված է.
«Ձերդ գերազանցություն,
Սրտանց շնորհավորում եմ Ձեզ և Լիտվայի բարեկամ ժողովրդին՝ Լիտվայի Հանրապետության ազգային տոնի՝ Պետության վերականգնման օրվա կապակցությամբ։ 105 տարի առաջ հռչակված անկախ և ինքնիշխան Լիտվան, պետության կերտման ճանապարհին դիմակայելով բազմաթիվ մարտահրավերների, այսօր իր արժանի տեղն է գտել աշխարհի ժողովրդավար երկրների շարքում։
Հայաստանը բարձր է գնահատում Լիտվայի հետ բարեկամական հարաբերությունները, որոնք հիմնված են պատմական, կրթամշակութային առնչությունների և ժողովրդավարական արժեքների վրա՝ ողջունելով Լիտվայի հետ համագործակցությունը` Հայաստանում ժողովրդավարական բարեփոխումների իրականացման և կառավարման բարելավման նպատակով։
Կցանկանայի գոհունակությամբ նշել երկու երկրների միջև քաղաքական երկխոսության բարձր մակարդակը և առևտրատնտեսական բնագավառներում զարգացող փոխշահավետ համագործակցությունը։ Սրա մասին են վկայում անցած տարվա հոկտեմբերին Վիլնյուսում կայացած՝ հայ-լիտվական առևտրատնտեսական և գիտատեխնիկական համագործակցության միջկառավարական հանձնաժողովի արդյունքներն ու առաջնային ոլորտներում գործակցության հեռանկարները։
Մենք կարևորում ենք Լիտվայի հետ սերտ համագործակցությունը նաև միջազգային կառույցների հարթակներում աշխարհաքաղաքական ճգնաժամային դրսևորումներին և տարածաշրջանային մարտահրավերներին դիմակայելու առումով՝ արժևորելով Լիտվայի՝ որպես ժողովրդավարական երկրի և մարդու իրավունքների խանդավառ պաշտպանի առավել ներառական դերակատարությունը հարավկովկասյան տարածաշրջանում խաղաղության հաստատման և ժողովրդավարական արժեքների ամրապնդման գործում»:
