«Ավագանու անդամին ասում եք՝ ո՞վ ա ասել, անունն ու համարը տուր․ ծիծաղելի է». Իզաբելլա Աբգարյանը՝ քաղաքապետին․ ՏԵՍԱՆՅՈՒԹ

Երևանի ավագանու անդամ Իզաբելլա Աբգարյանն օրերս իր ֆեյսբուքյան էջում գրառում էր կատարել Երևանի քաղաքապետարանի կողմից պետական գնումների ընթացակարգի՝ իր կարծիքով տեղ գտած խախտումների մասին։ Աբգարյանը պնդումներ էր արել նաև շինարարության նախագծի ու շինաշխատանքների վերահսկողության բացակայության մասին։

Այսօր Երևանի ավագանու նիստում դիմելով քաղաքապետ Հրաչյա Սարգսյանին՝ Աբգարյանը հետաքրքրվեց․ «Մինչև մրցույթում հաղթող ճանաչվելը ի՞նչ ճանապարհ է անցնում նախագիծը, հայտը քանի՞ դուռ է անցնում, որ մարդիկ չեն նկատում և ինձ են բողոքում»։

Քաղաքապետն ի պատասխան նշեց․ «Ո՞վ է այդ քաղաքացին, որ Ձեզ է դիմում․․․Ոնց հասկանում եմ, նույն քաղաքացին է միշտ դիմում։ Չեմ ասում, թե խնդիրներ չկան․․․ Կարո՞ղ է այդ քաղաքացու հետ ծանոթանանք, պարզվի ուրիշ խնդիրներ էլ կան, միանգամից․․․ Այդ քաղաքացու հետ, որը բարձրաձայնում է, տեղեկատվություն է տալիս, կարո՞ղ ենք հանդիպել»։

Քաղաքապետը հորդորեց խնդիրների մասին բարձրաձայնած քաղաքացիների կոնտակտային տվյալները փոխանցել։

«Ախր մի հոգի չէ,- պատասխանեց Աբգարյանը։

«Դուք ավագանու անդամ եք, հարցում անեիք քաղաքապետարան, եթե պատասխան չստանայիք, նոր կգնայիք ֆեյսբուքով կհրապարակեիք․․․ Մարդկանց մոտ կարծիք է առաջանում, թե այստեղ չգիտեմ ինչ են անում․․․ Կարծում եմ էդքան նորմալ չէ, որ անհայտ անձը ձեզ տեղեկություն է ուղարկում, դուք ֆեյսբուքյան էջում հրապարակում եք։

Բոլոր անձինք, որոնք բացահայտել են խնդիր և դիմել են Ձեզ, նրանց անուն – ազգանունները տվեք, ես հատուկ նրանց համար ընդունելություն կկազմակերպեմ,- խոստացավ քաղաքապետը՝ հավելելով՝ եթե նրանց տվյալները չեք տրամադրելու, ուրեմն իրավունք ունեմ մտածելու, որ ֆեյք են, կամ մի հոգի է, որը քաղաքական շահարկումներ անելով, ուզում է ինչ-որ խնդիրներ լուծել։

Աբգարյանն արձագանքեց․ «Ավագանու անդամը հենց նրա համար է, որ միջնորդ լինի քաղաքացու և քաղաքապետարանի միջև։ Ավագանու անդամին ասում եք՝ ո՞վ ա ասել, անունն ու համարը տուր․ ծիծաղելի է»։

Մանրամասները՝ տեսանյութում։