Էրդողանի դաշնակից Բահչելին շնորհակալություն է հայտնել Թուրքիային օգնության հասած երկրներին, այդ թվում՝ Հայաստանին

Թուրքիայի «Ազգայնական շարժում» կուսակցության նախագահ Դևլեթ Բահչելին, որը նախագահ Ռեջեփ Թայիփ Էրդողանի դաշնակիցն է, խորհրդարանական խմբակցության հետ հանդիպմանը մի շարք հայտարարություններ է հնչեցրել՝ հիմնականում ավերիչ երկրաշարժի վերաբերյալ, գրում են թուրքական լրատվամիջոցները։

Արձագանքելով կառավարությանն ուղղված քննադատություններին՝ նա ասել է, որ ամեն ջանք գործադրվում է։ Բացի այդ, Բահչելին շնորհակալություն է հայտնել Թուրքիային օգնության հասած երկրներին, այդ թվում՝ Հայաստանին։

«Կառավարությունն առանց հապաղելու շտաբներ է ստեղծել աղետի գոտում։ AFAD, AKUT, ոստիկանության որոնողափրկարարական, ժանդարմերիայի որոնողափրկարարական, ժանդարմերիայի հատուկ գործողությունների հրամանատարություն, ծովային ինժեներական որոնողափրկարարական, ազգային բժշկական որոնողափրկարարական, լեռնային որոնողափրկարարական խմբեր, հանքափորներ, առափնյա պահպանություն, հասարակական կազմակերպություններ, միջազգային որոնողափրկարարական խմբեր, կամավորներ, տեղական անվտանգություն և տեղական աջակցության թիմերից նշանակված դաշտային անձնակազմ։ Բոլորը գերմարդկային ջանքեր են գործադրել։ Ճապոնիայից Իսպանիա, Ադրբեջանից Հունաստան, Կատարից մինչև Արաբական Միացյալ Էմիրություններ, Թայվանից մինչև Չինաստան, Ավստրալիայից մինչև Լիբիա, Իսրայելից մինչև Հայաստան, Հնդկաստանից մինչև Ալբանիա, Ռուսաստանից մինչև Սաուդյան Արաբիա, Հյուսիսային Կիպրոսի Թուրքական Հանրապետությունից մինչև եվրոպական երկրներ։ 70 պետություններ շտապեցին Թուրքիային օգնելու։ Մենք շնորհակալ ենք նրանց բոլորին»,- ասել է Բահչելին։

Հավելենք, որ Հայաստանը Թուրքիա 100 տոննա մարդասիրական օգնություն  է ուղարկել, ինչպես նաև որոնողափրկարարական խումբ։

Էմմա Չոբանյան