ԱՄՆ-ը զգուշացրել է Ուկրաինային, որ պատերազմը հասել է շրջադարձային կետի․ The Washington Post

Ամերիկյան The Washington Post-ը գրում է, որ ԱՄՆ վարչակազմի պաշտոնյաներն ավելի ու ավելի պարզ են ասում ուկրաինական իշխանություններին, որ պատերազմը շրջադարձային կետում է, և Ուկրաինայի Զինված ուժերը պետք է հնարավորինս մեծ հաջողություններ ապահովեն մարտի դաշտում, քանի դեռ նրանք ստանում են արևմտյան օգնության մեծ ծավալներ։

Պարբերականի աղբյուրների համաձայն՝ Բայդենի վարչակազմը կարծում է, որ Կիևին արևմտյան օգնության վերջին փաթեթը հակամարտության ընթացքը կոտրելու լավագույն հնարավորությունն է տալիս։ Հետագայում իրավիճակը կարող է այնքան էլ բարենպաստ չլինել, քանի որ որոշ հանրապետականներ մտադիր են կրճատել Ուկրաինային աջակցությունը, և երկարաժամկետ հեռանկարում մատակարարումները նույն մակարդակի վրա պահելու՝ Եվրոպայի վճռականությունն այնքան էլ հստակ չէ:

«Մենք կշարունակենք բացատրել նրանց, որ մենք չենք կարող բացարձակապես ամեն ինչ անել անորոշ ժամանակով»,- ասել է ԱՄՆ կառավարության անանուն բարձրաստիճան պաշտոնյաներից մեկը։

The Washington Post-ը հայտնում է, որ Բայդենի վարչակազմն աշխատում է Կոնգրեսի հետ՝ Ուկրաինային ևս 10 միլիարդ դոլարի անմիջական բյուջետային օգնություն տրամադրելու համար։ Սակայն, գրում է թերթը, Ուկրաինային աջակցություն ցուցաբերելը քաղաքականապես ավելի դժվար կլինի, երբ ավարտվի ԱՄՆ Կոնգրեսի կողմից հաստատված օգնության ներկայիս փաթեթը, և դա կարող է տեղի ունենալ արդեն 2023 թվականի ամռանը։

Ըստ Բայդենի վարչակազմի պաշտոնյաների՝ պատերազմի կրիտիկական պահը կգա այս տարվա գարնանը, երբ Ռուսաստանը նոր լայնածավալ հարձակման կանցնի, և Ուկրաինան հնարավորություն կունենա հակահարձակման անցնելու՝ ուղղված տարածքների ազատագրմանը։ Այդ ժամանակ Կիևը պետք է ստանա և օգտագործի նոր զինատեսակներ, այդ թվում՝ արևմտյան տանկեր և զրահատեխնիկա։

Հրապարակման մեջ նշվում է նաև, որ ԱՄՆ-ի և Կիևի միջև որոշակի տարաձայնություններ են եղել, թե ինչպես մոտենալ ռազմական գործողությունների անցկացմանը։ Մասնավորապես, Ուկրաինայի զինված ուժերը մեծ ռեսուրսներ են ծախսում Դոնեցկի մարզի Բախմուտ քաղաքը պաշտպանելու համար։ Սակայն ամերիկացի ռազմական վերլուծաբաններն անիրատեսական են համարում միաժամանակ Բախմուտը պահելը և մեծ գարնանային հակահարձակում սկսելը՝ ԱՄՆ-ի տեսանկյունից ավելի կարևոր տարածքներ հետ գրավելու համար, գրում է թերթը։

Ուկրաինայի նախագահ Վլադիմիր Զելենսկին Բախմուտին խորհրդանշական նշանակություն է տվել, պարբերականին ասել են Բայդենի վարչակազմի երկու բարձրաստիճան պաշտոնյաներ։

ԱՄՆ կառավարության ներկայացուցիչներից մեկի խոսքով՝ եթե Ռուսաստանը գրավի Բախմուտը, «դա ռազմավարական ոչ մի փոփոխության չի հանգեցնի մարտի դաշտում»։

«Ռուսները կփորձեն դա ներկայացնել այդպես, բայց իրականում այն ընդամենը քարտեզի վրա մի կետ է, որի վրա նրանք անհավանական քանակությամբ արյուն ու ռեսուրսներ են ծախսել»,- ասել է պաշտոնյան։

The Washington Post-ը գրում է նաև Ուկրաինային 2014 թվականից հետո Ռուսաստանի կողմից օկուպացված ողջ տարածքները, այդ թվում՝ Ղրիմը վերադարձնելու խնդրի մասին։ Այժմ ուկրաինական իշխանությունների ներկայացուցիչները պնդում են, որ ավելի քչին չեն կարող համաձայնել։ Սակայն ամերիկյան հետախուզությունը, ըստ հրապարակման, եզրակացրել է, որ ուկրաինական բանակը դեռ ի վիճակի չէ ազատագրել լավ ամրացված Ղրիմի թերակղզին, և հետախուզական ծառայությունները հստակ բացատրել են այս դիրքորոշումը ԱՄՆ Կոնգրեսի մի քանի հանձնաժողովներում:

Տաթև Ֆռանգյան