Վյաչեսլավ Վոլոդինն ու Սահիբա Գաֆարովան ստորագրել են ՌԴ-ի ու Ադրբեջանի խորհրդարանների միջև համագործակցության առաջին համաձայնագիրը

ՌԴ Պետդումայի նախագահ Վյաչեսլավ Վոլոդինը պաշտոնական այցով Ռուսաստանում գտնվող Ադրբեջանի Միլլի Մեջլիսի նախագահ Սահիբա Գաֆարովայի հետ Պետդումայի և Միլլի Մեջլիսի միջև Համագործակցության համաձայնագիր է ստորագրել, տեղեկանում ենք ՌԴ Պետդումայի մամուլի ծառայության հաղորդագրությունից։

Սա ՌԴ Պետդումայի առաջին նման պայմանագիրն է Ադրբեջանի խորհրդարանի հետ։ Որոշում է կայացվել նաև ստեղծել բարձր մակարդակի միջխորհրդարանական հանձնաժողով։

«Մեր երկրների հարաբերությունները դինամիկ զարգանում են։ Պետք է երախտագիտության խոսքեր ասել մեր նախագահներին, որոնք ապահովում են այս թափը, հարաբերությունների զարգացման հզոր հիմքեր են դնում»,- ընդգծել է Պետդումայի նախագահը։

Նա նշել է, որ այսօր ստորագրված համաձայնագիրը շրջադարձային իրադարձություն է, որը թույլ կտա հասնել փոխգործակցության նոր մակարդակի հասնել Պետդումայի և Ադրբեջանի Միլլի Մեջլիսի միջև։

«Մեզ համար սա ոչ միայն շատ կարևոր, այլև պատասխանատու քայլ է հարաբերություններ կառուցելու ուղղությամբ, քանի որ խոսքը նոր ձևաչափերի ներդրման, դրանք կոնկրետ բովանդակությամբ լցնելու մասին է։ Եվ համաձայնագիրը պետք է լուծի այս խնդիրը»,- ասել է  Վոլոդինը՝ կոչ անելով ավելի ակտիվ զարգացնել փոխգործակցությունը համապատասխան հանձնաժողովների մակարդակով։

«Ադրբեջանի և Ռուսաստանի Դաշնության միջև հարաբերությունները զարգացել են մեր երկրների միջև դարավոր բարեկամության, բարիդրացիական կապերի, փոխըմբռնման և վստահության հիման վրա: Ամենակարևորն այն է, որ ամեն ինչ հիմնված է մեր ժողովուրդների բարեկամության վրա»,- իր հերթին ասել է Գաֆարովան։

Նա նաև վստահություն է հայտնել, որ համաձայնագրի ստորագրումը կնպաստի երկու երկրների միջև կապերի համակողմանի ամրապնդմանը։

Էմմա Չոբանյան