16.01.2026 | 18:16
«Ռոսատոմ»-ի ձեռնարկության տնօրենը ձերբակալվել է՝ Ուկրաինայի զինված ուժերին ֆինանսավորելու կասկածանքով
Թուրքիայի երկրաշարժի հետևանքով հայ համայնքից 11 մարդ է զոհվել
Քաղաքականություն
13.02.2023 | 16:17
Թուրքիայում ավերիչ երկրաշարժերի հետևանքով հայ համայնքից զոհերի թիվը 11 է։ Մասնավորապես, Ստամբուլում լույս տեսնող Ակոս պարբերականը հայտնում է, որ Իսկենդերունից լուր չի եղել Արմիկ, Մեսրոպ և Թակուն Բալըքյաններից։ Սակայն հայտնի է դարձել, որ ընտանիքի անդամները մահացել են։ Նույն շրջանից զոհվել է նաև Փայծառ Սիլահլըն։
Փլատակների տակ հայտնաբերվել են Դիարբեքիրից երգչուհի Զիլան Տիգրիսի և նրա ամուսնու՝ Չաղդաշ Չանքայայի մարմինները։ Նրանց հուղարկավորությունը նախօրեին է տեղի ունեցել։ Իսկ վաղը Ֆերիքոյի Սուրբ Վարդանանց եկեղեցում տեղի է ունենալու էքսկուրսավար Յոհաննա Կարոլինա Կափի հոգեհանգստի արարողությունը, որը Ադըյամանում է զոհվել։
Երկրաշարժի առաջին իսկ օրն էլ հայտնի էր դարձել Մալաթիայի հայ համայնքից երեք զոհի մասին։ Նրանք են՝ Սամի Թաբաշը և Աիդա Թաբաշը, ինչպես նաև ընտանիքի երեխաներից մեկը՝ Ալեքս Թաբաշը, որը մահացել է հիվանդանոցում։
Մալաթիայի հայ համայնքից Մարիամ Քարաթաշն էլ զոհվել է երկրորդ երկրաշարժի ժամանակ։ Նրա մարմինը դուրս են բերել փլատակների տակից և հողին հանձնել Մալաթիայի հայկական գերեզմանատանը։
Անթաքիայի հայերից Անտուան Հորոզը նույնպես զոհվել է երկրաշարժից։
Հավելենք, որ Թուրքիայում երկրաշարժի հետևանքով զոհերի ու վիրավորների թիվը շարունակում է աճել։ Վերջին տվյալներով՝ զոհերի թիվը գերազանցել է 31,000-ը։
Էմմա Չոբանյան
