Սեյրան Օհանյանի և Արմեն Չարչյանի նկատմամբ հանրային քրեական հետապնդում հարուցելու որոշում է կայացվել․ Օհանյանին մեղադրանք է առաջադրվել

Դատախազը Ազգային Ժողովի «Հայաստան» խմբակցության պատգամավորներ Սեյրան Օհանյանի և Արմեն Չարչյանի նկատմամբ հանրային քրեական հետապնդում հարուցելու որոշում է կայացվել։ Այս մասին Factor.am-ի հարցին ի պատասխան ասաց Գլխավոր դատախազի խորհրդական Լուսինե Մարտիրոսյանը։ Վերջինիս խոսքով՝ Սեյրան Օհանյանին մեղադրանք է առաջադրվել։

ՀՀ Սահմանադրության 96-րդ հոդվածի համաձայն՝ պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ։ Փետրվարի 9-ին Ազգային ժողովը համաձայնություն է տվել Արմեն Չարչյանի նկատմամբ քրեական հետապնդում հարուցելու հարցին։ Նշենք, որ Չարչյանը մեղադրվում է Հաց բերող անունով հայտնի Արթուր Սարգսյանի գործով ակնհայտ կեղծ բժշկական եզրակացություն տալու մեջ։

Դատախազ Աննա Վարդապետյանը հունվարի 20-ին Ազգային ժողովի նախագահ Ալեն Սիմոնյանին է ներկայացրել նաև Սեյրան Օհանյանի նկատմամբ քրեական հետապնդում հարուցելուն համաձայնություն տալու մասին երեք միջնորդագիր, որոնք բավարարվել են։
Առաջին քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը, օգտագործելով պաշտոնեական դիրքը, կատարել է առանձնապես խոշոր չափերով վատնում (երկու դրվագ), ինչպես նաև՝ անձնական այլ շահագրգռվածությունից և խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, որն անզգուշությամբ առաջացրել է ծանր հետևանքներ (երկու դրվագ)։

Երկրորդ քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը, հանդիսանալով պաշտոնատար անձ, խմբային շահերից ելնելով, պաշտոնեական դիրքն օգտագործել է ծառայության շահերին հակառակ, նաև չի կատարել ծառայողական պարտականությունները, որն անզգուշությամբ առաջացրել է ծանր հետևանքներ, ինչպես նաև՝ վատնելու եղանակով հափշտակել է առանձնապես խոշոր չափերի գույք:

Երրորդ քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը վատնելու եղանակով հափշտակել է առանձնապես խոշոր չափերի գույք:

Արաքս Մամուլյան