ՌԴ-ն մեզ օկուպանտ կոչեց․ դո՛ւ ես բռնազավթել Հայաստանը, ի՛նքդ ես օկուպանտը․ ինչո՞ւ սա չի ասվում․ Պարույր Հայրիկյան․ ՏԵՍԱՆՅՈՒԹ

ՌԴ-ն շարունակում է մե՛կ ԱԳ նախարարի, մե՛կ Ադրբեջանում իր դեսպանի միջոցով բացասական երանգներով խոսել Հայաստան ԵՄ դիտորդների գալու մասին։ Նախնական տեղեկություններով՝ փետրվարի 20-ից ՀՀ-ում կսկսեն աշխատել ԵՄ դիտորդները, որոնց կազմում կան նաև ութ ֆրանսիացի ժանդարմներ։ Բաքվում ՌԴ դեսպանն է հայտարարել, թե ԵՄ-ի գործողություններն ուղղված են Ռուսաստանին ադրբեջանա-հայկական հարաբերությունների կարգավորման գործընթացից հեռացնելուն։ Նա ենթադրել է, որ ԵՄ առաքելությունը կվերածվի ռազմական բաղադրիչով ներկայության, և կընդլայնվի դեպի Լեռնային Ղարաբաղ, ինչը խնդիրներ կառաջացնի ռուս խաղաղապահների և սահմանապահների համար։

Հայտարարություններից բացի՝ սպասե՞լ գործողություններ ԵՄ դիտորդների դեմ ռուսական կողմից։ «Ազգային ինքնորոշում միավորում» կուսակցության նախագահ Պարույր Հայրիկյանը Factor TV-ին տված հարցազրույցում ասում է, որ պետությունների մակարդակով արված հայտարարություններն ինքնին գործողության են հավասարազոր կամ գոնե գործողության տրամադրվածության մասին են վկայում։

«Ռուսաստանն այնպես է խոսում, կարծես ինքը պետք է հավերժ մնա այդտեղ, սակայն մոռանում են, որ ընդամենը երկու տարի ժամանակ ունեն։ Բազում անգամներ Ադրբեջանն ասել է, որ չի պատրաստվում երկարաձգել խաղաղապահների ժամկետը։ ՌԴ իշխանությունը և նրա կամակատարներն այդ կեցվածքով ճիշտ կլինեին, եթե հայտարարած լինեին, որ հրաժարվում են Մինսկի խմբի համանախագահությունից։ Մինսկի խումբն ունի երեք համանախագահ, և դրանք գործընկերներ են՝ հավասար իրավունքներով ու պարտավորություններով։ Երբ Ֆրանսիան և ԱՄՆ-ն թերացան 2020 թվականին, այսինքն՝ չթերացան, հայտարարությունների մակարդակով խոսեցին, ինչը պատշաճ արձագանք չստացավ ՀՀ իշխանական լծակներին տիրապետողներից, ավելին՝ նրանք հակադրվեցին Արևմուտքին։ Արդյունքում՝ ՌԴ-ն իրեն երևակայեց տարածաշրջանում և աշխարհում միակ կարգավորողը, խաղաղություն բերողը։ Թե ինչի հանգեցրեց դա, բոլորս գիտենք։ Պատահական չէ, որ Ֆրանսիայի նախագահ Էմանուել Մակրոնը 2020 թվականի պատերազմը բնութագրեց ՌԴ-ի և Ադրբեջանի համատեղ հարձակում ՀՀ-ի վրա։ Մեզ համար դա ակնհայտ էր՝ տարիներ շարունակ Ադրբեջանին մեծ քանակի, միլիարդավոր դոլարների զենքեր էր մատակարարում Մոսկվան, որը հարձակվողական վտանգավոր զենք էր։ Դա ցույց էր տալիս, որ ՌԴ-ն մեր բարեկամը չէ»,- ասում է Պարույր Հայրիկյանը։

Հարցազրույցն ամբողջությամբ՝ տեսանյութում։

Ռոբերտ Անանյան