14.09.2026 | 22:01
Հայաստանի մի շարք հասցեներում էլեկտրաէներգիայի անջատումներ կլինեն
Խաբարովսկի երկրամասի նախկին նահանգապետը դատապարտվել է 22 տարվա ազատազրկման
Քաղաքականություն
10.02.2023 | 15:19
Խաբարովսկի երկրամասի նախկին ղեկավար Սերգեյ Ֆուրգալը դատապարտվել է 22 տարվա ազատազրկման երկու սպանության և սպանության փորձի գործով, որոնք կատարվել են 2000-ականների սկզբին։ Նախկին նահանգապետը, ում ձերբակալությունն ուղեկցվել է տարածաշրջանում զանգվածային բողոքի ցույցերով, իրեն մեղավոր չի ճանաչել, գրում է BBC-ի ռուսական ծառայությունը։
Փետրվարի 2-ին ատենակալների դատարանը Ֆուրգալին մեղավոր է ճանաչել գործարար Ալեքսանդր Սմոլսկու դեմ մահափորձի և ձեռնարկատերեր Եվգենի Զորյայի ու Օլեգ Բուլատովի սպանությունները կազմակերպելու համար։ Ըստ մեղադրող կողմի՝ Ֆուրգալը մրցել է այս ձեռնարկատերերի հետ, երբ 2000-ականներին գործարարությամբ էր զբաղվում։
Երեք դրվագներում էլ ատենակալները Ֆուրգալին ճանաչել են ներման ոչ արժանի։ Նախկին մարզպետը, լսելով դատավճիռը, բղավել է, որ ամաչում է երդվյալ ատենակալների փոխարեն։
Ֆուրգալն իր գործը բազմիցս անվանել է քաղաքական պատվեր: Նա գործի քննությունը դատարանում անվանել է «արդարադատության վերջնական ավարտ»։
«Ինչպե՞ս կարող ենք ինչ-որ բան քննարկել, եթե սա արդարադատության վերջնական ավարտն է: Մենք կսպասենք, մինչև ինչ-որ նոր բան ծնվի: Միգուցե մեր երեխաները կամ մեր թոռներն արդարություն տեսնեն»,- ասել է նա։
Դատախազը պահանջել է Ֆուրգալին դատապարտել 23 տարվա ազատազրկման։
Գործով ևս երեք մեղադրյալներ՝ Մարատ Կադիրովը, Անդրեյ Պալեյը և Անդրեյ Կարեպովը, որոնց մեղադրող կողմը համարում է Ֆուրգալի հանցակիցներ, դատապարտվել են երկարաժամկետ ազատազրկման։ Նրանք նույնպես իրենց մեղավոր չեն ճանաչել։
Ըստ քննիչների՝ Ֆուրգալը հանցավոր խմբի կազմակերպիչն է եղել, որը 2004-2005 թվականներին կատարել է Զորյայի և Բուլատովի սպանությունները, ինչպես նաև Սմոլսկու սպանության փորձը։ Հետաքննությունը պնդում է, որ սպանությունների կատարման որոշումները «կայացվել են Ֆուրգալի և նրա հանցակիցների կոմերցիոն շահերի առաջմղմամբ»։
Ըստ քննիչների՝ նախ Ֆուրգալը և նրա բիզնես գործընկեր Նիկոլայ Միստրյուկովը որոշել են վերացնել Սմոլսկուն, որը մետաղի ջարդոնի հավաքման կետեր ուներ և նրանց համար մրցակից էր։
Երկու նռնակ նետվել է դեպի ավտոտնակ, որտեղ գտնվում էր Սմոլսկին. մեկը պայթել է դարպասի մոտ, երկրորդը ներս է ընկել, բայց չի պայթել, ինչի շնորհիվ Սմոլսկին ողջ է մնացել՝ ստանալով մարմնական վնասվածքներ։ Հարձակումից հետո նա իջեցրել է մետաղի ջարդոնի գնման գները։
Ֆուրգալը քրեական հետապնդումը քաղաքական է համարում։ Բանն այն է, որ Ֆուրգալը նահանգապետի թեկնածու էր առաջադրվել Լիբերալ-դեմոկրատական կուսակցության կողմից և դարձել նահանգապետի չորս թեկնածուներից մեկը, ովքեր կարողացել են առաջ անցնել Կրեմլի թեկնածուներից 2018 թվականի սեպտեմբերին կայացած ընտրություններում։ 2020 թվականի հուլիսի 9-ի գիշերը նրան ձերբակալել են Խաբարովսկում և ինքնաթիռով ուղարկել Մոսկվա։ Այդ ժամանակից նա գտնվում է Լեֆորտովոյի քննչական մեկուսարանում։
Նախագահի աշխատակազմում BBC-ի զրուցակիցը Ֆուրգալի ձերբակալությունը կապել է նահանգապետի լիազորությունները սեփական կամքով վայր դնելու առաջարկից հրաժարվելու հետ։ Ֆուրգալի ձերբակալությունը Խաբարովսկում բողոքի աննախադեպ ալիք է բարձրացրել, ցույցերը շարունակվել են մի քանի ամիս։
Տաթև Ֆռանգյան
