27.06.2026 | 17:51
Վարչապետն այցելել է «Կոնդ». դիտարկվել է թաղամասի քաղաքաշինական հայեցակարգի իրականացման հնարավորությունը
Թուրքիայում երկրաշարժը լուրջ դժվարություններ է առաջացրել մայիսի 14-ին ընտրությունների անցկացման համար․ թուրք պաշտոնյա
Քաղաքականություն
10.02.2023 | 14:48
Թուրքիայի հարավում տեղի ունեցած երկրաշարժի ավերիչ մասշտաբը «լուրջ դժվարություններ» է ստեղծում մայիսի կեսերին նախատեսված ընտրությունների համար։ Այս մասին Reuters-ին ասել է թուրք պաշտոնյան՝ անանունության պայմանով, գրում է Turkish Minute-ը։
Սա առաջին նշանն է, որ իշխանությունները կարող են ընտրությունները հետաձգել։ Նախագահ Ռեջեփ Թայիփ Էրդողանը, որը ցանկանում է իր իշխանությունը երկարաձգել մինչև երրորդ տասնամյակ, անցյալ ամիս ասել է, որ ընտրությունները տեղի կունենան մայիսի 14-ին։ Երկրաշարժից առաջ հրապարակված սոցհարցումները ցույց էին տալիս, որ դա կլինի նրա ամենածանր ընտրական մարտահրավերը։
«Իրականում շատ վաղ է խոսել ընտրությունների մասին։ Երեք ամիս արտակարգ դրություն է, բնակչության 15 տոկոսն ապրում է այն տարածաշրջանում, որն արտադրում է ՀՆԱ-ի մոտ 10 տոկոսը»,- լրատվամիջոցին ասել է պաշտոնյան։
Նա նշել է, որ Էրդողանի «Արդարություն և զարգացում» (AKP) ու նրա խորհրդարանական դաշնակից «Ազգայնական շարժում» կուսակցությունները (MHP) ուսումնասիրում են այդ հարցը, սակայն դեռ վաղ է որոշում կայացնել երկրաշարժից անմիջապես հետո, քանի դեռ զոհերի թիվն աճում է։
«Կարծես թե դուրս ենք եկել ընտրական շրջանից, ուր մտնում էինք։ Մենք կնայենք զարգացումներին, բայց հենց հիմա լուրջ դժվարություններ կան մայիսի 14-ին ընտրություններ անցկացնելու հարցում»,- ասել է պաշտոնյան։
Երկրաշարժից առաջ սպասվում էր, որ Էրդողանը մարտին է պաշտոնապես հայտարարելու, որ նախագահական և խորհրդարանական ընտրությունները հունիսի կեսից տեղափոխում է մայիսի 14։
Էմմա Չոբանյան
