Սարգիս Խանդանյանը՝ ԱԺ արտաքին հարաբերությունների մշտական հանձնաժողովի նախագահի թեկնածու․ ՏԵՍԱՆՅՈՒԹ

Ազգային ժողովի այսօրվա նիստում քննարկել է Ազգային ժողովի արտաքին հարաբերությունների մշտական հանձնաժողովի նախագահի ընտրության հարցը: «Քաղաքացիական պայմանագիր» խմբակցությունը ՀՀ ԱԺ արտաքին հարաբերությունների մշտական հանձնաժողովի նախագահի թափուր պաշտոնում առաջադրել է Սարգիս Խանդանյանի թեկնածությունը:

Թեկնածուն շնորհակալություն է հայտնել «Քաղաքացիական պայմանագիր» խմբակցությանը` հանձնաժողովի նախագահի պաշտոնում իրեն առաջադրելու համար: Սարգիս Խանդանյանը շնորհակալություն է հայտնել նաև հանձնաժողովի նախկին նախագահ Էդուարդ Աղաջանյանին` նախորդ մեկուկես տարվա ընթացքում մեր երկրի համար բարդ շրջափուլում հանձնաժողովը ղեկավարելու իր պարտականությունները լավագույնս կատարելու համար:

«Արտաքին հարաբերությունների հանձնաժողովը կարևոր դերակատարում ունի խորհրդարանական դիվանագիտության աշխատանքները կազմակերպելու տեսանկյունից: Հայաստանի անվտանգային և արտաքին քաղաքական մարտահրավերներին դիմակայելու, մեր երկրի ասելիքը և արտաքին քաղաքականությունն առավել ընկալելի ու տեսանելի դարձնելու համար կարևոր է շարունակել ակտիվորեն օգտագործել խորհրդարանական դիվանագիտության ողջ գործիքակազմը և այդ հարցում լինել առավել նախաձեռնողական»,- նշել է զեկուցողը:

Սարգիս Խանդանյանը խոսել է նաև հանձնաժողովի և, ընդհանրապես, խորհրդարանական դիվանագիտության հրատապ անելիքների մասին, անդրադարձել ՀՀ արտաքին քաղաքական առաջնահերթություններին, ներկայացրել դրանց վերաբերյալ իր պատկերացումները:

Խանդանյանն անդրադառնալով արտաքին քաղաքական օրակարգերին՝ մեջբերել է «Քաղաքացիական պայմանագիր» կուսակցության՝ վերջերս ընդունված ծրագիրը՝ նշելով, որ ամբողջությամբ համակարծիք է: «ՀՀ և ԼՂ անվտանգության ապահովման միջոցը համակեցության բանաձևի մշակումն է տարածաշրջանի բոլոր երկրների, առաջին հերթին անմիջական հարևանների՝ Թուրքիայի և Ադրբեջանի, Իրանի, Վրաստանի հետ: Հայաստանը չպետք է սպառնալիքի աղբյուր դիտարկվի հարևանների համար, հարևանները չպետք է սպառնալիքի աղբյուր դիտվեն Հայաստանի համար»,- նշել է պատգամավորը:

Եզրափակելով խոսքը` Խանդանյանը հավաստիացրել է, որ ընտրվելու դեպքում, ինչպես միշտ, այժմ էլ իր գործունեության ընթացքում առաջնորդվելու է ՀՀ պետական շահերի, անկախության և ինքնիշխանության պաշտպանության սկզբունքներով և փորձելու է լինել հնարավորինս նախաձեռնող և հաշվետու:

Մանրամասները՝ տեսանյութում։