09.10.2026 | 11:42
Լոռիում քննարկվել է ԱԲ-ի կիրառումը հաշմանդամություն ունեցող անձանց իրավունքների պաշտպանության համար
Թուրքական կողմը Փաշինյան-Էրդողան հեռախոսազրույցի մասին առանձին հաղորդագրություն չի տարածել
Քաղաքականություն
08.02.2023 | 12:05
Արդեն հայտնել ենք, որ ՀՀ վարչապետ Նիկոլ Փաշինյանը երեկ հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ: ՀՀ կառավարության հաղորդմամբ՝ վարչապետը ցավակցություն ու զորակցություն է հայտնել Թուրքիայի նախագահին և ժողովրդին՝ երկրի հարավարևելյան շրջաններում տեղի ունեցած հուժկու երկրաշարժի հետևանքով բազմաթիվ զոհերի կապակցությամբ: Թուրքական կողմից հեռախոսազանգի վերաբերյալ մանրամասներ չեն հաղորդվում։ Թուրքիայի նախագահի մամուլի ծառայությունը միայն ընդհանուր հաղորդագրություն է տարածել, որում նշվում է, որ Գերմանիայի, Մեծ Բրիտանիայի, Նիդերլանդների ու Հայաստանի վարչապետները զանգահարել են նախագահ Էրդողանին, իրենց ցավակցությունները հայտնել, վիրավորներին էլ շուտափույթ ապաքինում մաղթել։
Հիշեցնենք՝ ՀՀ վարչապետի մամուլի ծառայության տարածած հաղորդագրությունում, մասնավորապես, ասված է․ «Նիկոլ Փաշինյանը շուտափույթ ապաքինում է մաղթել բոլոր վիրավորներին և հավելել, որ Երևանի «Զվարթնոց» օդանավակայանից թռիչքի է պատրաստվում Հայաստանի Հանրապետության փրկարարական ուժերին աղետի գոտի տեղափոխող ինքնաթիռը: Ռեջեփ Թայիփ Էրդողանը ՀՀ վարչապետին շնորհակալություն է հայտնել զորակցության համար և նշել, որ Թուրքիայի կառավարությունը բարձր է գնահատում Հայաստանի աջակցությունը՝ կարևորելով այդ քայլը նաև երկու երկրների միջև հետագա երկխոսության խորացման տեսանկյունից»։
Էմմա Չոբանյան
