Քաղաքականություն
07.02.2023 | 20:40Փետրվարի 7-ին աշխատանքային այցով Բեռլինում գտնվող Հայաստանի Հանրապետության ԱԳ նախարար Արարատ Միրզոյանը հանդիպում է ունեցել Գերմանիայի Դաշնային Հանրապետության արտաքին գործերի նախարար Անալենա Բերբոքի հետ, որի արդյունքներով Հայաստանի և Գերմանիայի ԱԳ նախարարները հանդես են եկել համատեղ մամուլի ասուլիսով:
Միրզոյանն ասուլիսում մանրամասն ներկայացրել է Լեռնային Ղարաբաղի շուրջ ստեղծված իրավիճակը:
«Այս պահին, երբ մենք խոսում ենք, Լեռնային Ղարաբաղի 120 000 հայությունն ապրում է տոտալ շրջափակման մեջ` կտրված ամբողջ աշխարհից: Եվ սա շարունակվում է արդեն երկու ամիս: Կարո՞ղ եք պատկերացնել արդյոք՝ երկու ամիս մարդիկ զրկված են ազատ տեղաշարժի իրենց հիմնարար իրավունքից:
Լաչինի միջանցքի շրջափակումը, ինչպես նաև դրան նախորդած այլ ագրեսիվ գործողությունները, ինչպես, օրինակ, Հայաստանի ինքնիշխան տարածք ադրբեջանական զինված ուժերի ներխուժումը և կենսագործունեության համար անտանելի պայմանների ստեղծումը Լեռնային Ղարաբաղում ունեն մեկ նպատակ՝ ստիպել Լեռնային Ղարաբաղի հայ բնակչությանը լքել իրենց տները և, ըստ էության, դրանով իսկ զրկել նրանց հայրենիքում ապրելու իրավունքից։ Սա բնորոշել այլ կերպ, քան էթնիկ զտումների քաղաքականություն, թերևս հնարավոր չէ։ Սա է Ադրբեջանի պատասխանը Լեռնային Ղարաբաղի ժողովրդի իրավունքների ու անվտանգության խնդիրը հասցեագրելու միջազգային հանրության կոչերին»,- նշել է ՀՀ ԱԳ նախարարը:
Գերմանիայի արտգործնախարար Անալենա Բերբոքը ընդգծել է՝ պետք է հարգել Հայաստանի և Արդբեջանի տարածքային ամբողջականությունը, որը հաստատված է 1991թ-ի միջազգային փաստաթղթերում, իսկ ԵՄ առաքելության դերը չեզոք դիտորդությունն է: Գերմանիայի գլխավոր դիվանագետը քննադատել է Լաչինի շրջափակումը,- նշել է Միրզոյանը։
Մանրամասները՝ տեսանյութում։
