«Սերժանտն ասեց՝ տղե՛րք, բերել են մեզ էստեղ, ասել են՝ ապահով ա, բայց թուրքերն եկել մտել են». վկայի ցուցմունքը․ ՏԵՍԱՆՅՈՒԹ

Երևանի ընդհանուր իրավասության դատարանում շարունակվում է Արցախյան երրորդ՝ 44-օրյա պատերազմում մարտադաշտն ինքնակամ լքելու մեջ մեղադրվող Իշխան Վահանյանի գործով դատական նիստը։

Նիստերի դահլիճում են նաև 44-օրյա պատերազմի ժամանակ զոհված կամ անհետ կորած այն զինծառայողների հարազատները, որոնց զովելու կամ անհետ կորելու հանգամանքը կապվում է հրամանատար Իշխան Վահանյանի գործողությունների հետ։

Իշխան Վահանյանը Հադրութում՝ «Վիշկա» կոչվող սարի մոտ մեզ թողել ու հեռացել է, փախել է։
Մանրամասն չեմ կարող ասել՝ ուր է գնացել, բայց այդպես է եղել»,- դատախազի հարցերին պատասխանելիս այս մասին ասաց 44-օրյա պատերազմի մասնակից, գործով վկա Մստո Մստոյանը։

«Պատերազմի 8-րդ օրը տեղափոխվել ենք Հադրութ՝ մեր հրամանատարների հետ ոտքով նահանջել ենք։ Մեր առաջին վաշտով նահանջի ժամանակ ունեցել ենք 1 զոհ, 2 վիրավոր։ Տեղակայվել ենք Հադրութում զորամասի պադվալում, հաջորդ օրը մի մասս գնացել ենք Արա լեռ, մյուս մասը՝ չգիտեմ ուր։ Հետո ասին՝ թուրքերը Արա լեռ են եկել, մենք գնացել ենք հետ շպրտենք նրանց, անձրև ու բուք էր, մեկ-մեկուկես ժամ սպասել ենք, հետո իջել ենք Հադրութ։ Գնացել ենք զորամաս, հետո գունդը հավաքվում էր Հադրութի դպրոցում։

Մեզ մոտ մնացել էր Վահան Իշխանյանը, որը որպես գումարտակի հրամանատար էր արդեն։

Մեր վաշտի առաջին և երկրորդ դասակին գիշերը տեղափոխեցին ուրիշ տեղ՝ ասելով ապահով տեղ է։ Հրաման եղել է Վահանյան իշխանի կողմից․․․ Այդտեղ էլ ենք ունեցել 2 վիրավոր․․․

«Վիշկա» կոչվող սար ենք բարձրացել, փոխարինել ենք մոբ-երին․․․ Այդ ժամանակ մեր սպայակազմը եղել է ուրիշ տեղ․․․ Հիշում եմ, որ ճամփին էինք, պիտի գնայինք «Վիշկա», զանգեցին, սերժանտներն էին խոսում,  ասին՝ տղե՛րք, բերել են մեզ էստեղ, ասել են՝ ապահով ա, բայց թուրքերն եկել – մտել են, ունենք զոհեր․․․»,- պատմեց Մստոյանը։

Մանրամասները՝ տեսանյութում։