Սերժ Սարգսյանը մերժեց Լավրովին՝ պատերազմ սկսվեց․ թող բացահայտի՝ ինչո՞ւ ՊՊԾ գունդը գրավվեց ու Կարեն Կարապետյանը եկավ ՀՀ․ Նորայր Նորիկյան․ ՏԵՍԱՆՅՈՒԹ

Կարո՞ղ է, արդյոք, Ռուսաստանը լինել լեգիտիմ միջնորդ Հայաստանի և Ադրբեջանի միջև բանակցություններում՝ այն դեպքում, երբ Լավրովը ՀՀ-ին «օկուպանտ» է կոչում, թե դա է պատճառը, որ ՀԱՊԿ-ն չի աջակցում և Ադրբեջանի գործողություններին գնահատական չի տալիս։

Factor TV-ին տված հարցազրույցում «Արդար Հայաստան» կուսակցության ղեկավար Նորայր Նորիկյանին հարց ուղղեցինք՝ պե՞տք է ՀՀ-ն դնի ռուսական օբյեկտիվության հարցը՝ որպես միջնորդի։ Քաղաքական գործիչը նախ հիշեց, որ Ալիևն էլ Ֆրանսիայի օբյեկտիվությունն է դնում կասկածի տակ՝ Մակրոնին մեղադրում է հայամետ դիրքորոշման մեջ։ Ըստ Ադրբեջանի նախագահի՝ Պրահայում իր մոտ տպավորություն է եղել, որ ՀՀ-ն ու Ֆրանսիան մի կողմում էին, Ադրբեջանը մենակ էր, իսկ Շառլ Միշելը դատավոր էր։

«Բայց վերադառնալով հարցին․ իսկ ե՞րբ է ՌԴ-ն օբյեկտիվ եղել, ինքը երբեք ԼՂ-ի կոնֆլիկտի պատմության ընթացքում չի եղել օբյեկտիվ մոդերատոր։ Նա մշտապես հետապնդում է իր ռազմավարական շահերը։ ՌԴ-ն, հանդիսանալով ՀՀ-ի ռազմավարական դաշնակիցը, հինգ միլիարդ դոլարից ավելի զենք է մատակարարել Ադրբեջանին, և դա ՀՀ նախկին կառավարիչները բիզնես էին դիտում։ Նույն 1994-ից հետո ՌԴ-ի հարաբերական չեզոքությունը բերեց նրան, որ խախտվեց ռազմաքաղաքական չեզոքությունը։ Պետք է ցույց տանք մեր քաղաքական մտքի և էլիտայի ամլությունը, որ երբեք ճիշտ չի գնահատվել ՌԴ-ի իրական ակնկալիքներն ու գործելաոճը։ Մեզ մոտ ձևավորվել է կաղապարված մտածողություն, որ ՌԴ-ի զորքն այստեղ է՝ պաշտպանելու Հայաստանը»,- նշում է Նորայր Նորիկյանը։

Նրա համար մտահոգիչ է այն, որ ՀՀ-ում կան քաղաքական գործիչներ, որոնք ՌԴ-ից ավելի ռուս են, այսինքն՝ ավելի մեծ փութաջանությամբ են սպասարկում նրա շահերը՝ նսեմացնելով ՀՀ-ի շահերը։

Ստոկհոլմում գործող Միջազգային խաղաղության ուսումնասիրության ինստիտուտի (SIPRI) համաձայն` 2011-2020թթ. ընթացքում Ադրբեջանին սպառազինություն մատակարարած առաջին ու երրորդ երկրները ՀԱՊԿ անդամներ Ռուսաստանն ու Բելառուսն են։ Այդ տարիներին Ադրբեջանը Հայաստանի դաշնակից համարվող երկրներից ստացել է իր ներմուծած զենքի 67.2%-ը` ավելի քանի երկու երրորդը։ Նույն ժամանակահատվածում Թուրքիայից ներմուծել է ամբողջի ընդամենը 2.9%-ը։ Եվ աստիճանաբար փոխվել է Ադրբեջանի և ՌԴ-ի միջև եղած ռազմաքաղաքական բալանսը։ 2017 թվականին ՀՀ ԱԽ զեկույցի համաձայն՝ ՀՀ-ն Ադրբեջանին կրիտիկական ենթակառուցվածքներով զիջել է 10 անգամ, իսկ ռազմական, էներգետիկ, տրանսպորտային գործոններն էլ գումարած՝ 21 անգամ։

Հարցազրույցն ամբողջությամբ՝ տեսանյութում։

Ռոբերտ Անանյան