25.06.2026 | 04:04
ԱԱ-2026. Բրազիլիան հաղթեց խոշոր հաշվով, Մարոկկոն ևս փլեյ-օֆֆում է. ՏԵՍԱՆՅՈՒԹ
Հռոմի պապը պատրաստ է հանդիպել Պուտինի և Զելենսկու հետ
Քաղաքականություն
06.02.2023 | 17:00
Հռոմի Ֆրանցիսկոս պապը պատրաստ է հանդիպել Ռուսաստանի և Ուկրաինայի նախագահներ Վլադիմիր Պուտինի և Վլադիմիր Զելենսկու հետ՝ քննարկելու Ուկրաինայում պատերազմի ավարտը։ Corriere della Sera-ի հաղորդմամբ՝ այս մասին կոթոլիկ քահանայապետն ասել է կիրակի՝ փետրվարի 5-ին, փոխանցում է DW-ի ռուսական ծառայությունը:
«Ես բաց եմ երկու նախագահների՝ Ուկրաինայի նախագահի և Ռուսաստանի նախագահի հետ հանդիպելու համար»,- խաղաղության քննարկման համար Ռուսաստանի և Ուկրաինայի առաջնորդների հետ հանդիպման հնարավորության մասին հարցին ի պատասխան՝ ասել է Ֆրանցիսկոս պապը։
Նրա խոսքով՝ Կիև չի մեկնել միայն այն պատճառով, որ հնարավորություն չի ունեցել նույն այցը կատարել Մոսկվա։
«Երկխոսություն եմ ունեցել, պատերազմի երկրորդ օրը գնացի Ռուսաստանի դեսպանատուն՝ ասելու, որ ուզում եմ գնալ Մոսկվա՝ Պուտինի հետ զրուցելու, քանի դեռ բանակցությունների համար փոքր պատուհան կա։ Այն ժամանակ նախարար Լավրովը պատասխանել էր, որ գնահատում է դա, բայց և ասել՝ «Կտեսնենք ավելի ուշ»»,- պատմել է Հռոմի պապը։
Ավելի վաղ 85-ամյա Ֆրանցիսկոսը բացատրել էր, որ Կիև և Մոսկվա մեկնելուն, ի թիվս այլ բաների, խոչընդոտում է նաև իր առողջական վիճակը։
Նշենք, որ Հռոմի պապը բազմիցս հայտնել է Մոսկվայի և Կիևի միջև բանակցություններում միջնորդ դառնալու իր պատրաստակամության մասին, ինչպես նաև Ուկրաինայում պատերազմի ավարտի հույս հայտնել և համերաշխության կոչ արել ուկրաինացիներին։
Տաթև Ֆռանգյան
