Հզոր երկրաշարժը Թուրքիայում և Սիրիայում հարյուրից ավելի մարդու կյանք է խլել

Թուրքիայի հարավ-արևելքում՝ Սիրիայի հետ սահմանի մոտ, հզոր երկրաշարժ է տեղի ունեցել։ Թուրքիայում մահացել է ավելի քան 76 մարդ, իսկ հարևան Սիրիայում՝ ավելի քան 50 մարդ։ Զոհերի թիվն անշեղորեն աճում է, գրում է BBC-ի ռուսական ծառայությունը։

ԱՄՆ Երկրաբանական ծառայությունը հայտնել է, որ 7,8 մագնիտուդով երկրաշարժը տեղի է ունեցել տեղական ժամանակով 04:17-ին Գազիանթեփ քաղաքի մոտակայքում՝ 17,9 կմ խորության վրա:

Փլուզվել են մի քանի շենքեր, փլատակների տակ որոնում են ողջ մնացածներին:

Թուրքիայի ներքին գործերի նախարար Սուլեյման Սոյլուն հայտնել է, որ տուժել է 10 քաղաք՝ Գազիանթեփը, Քահրամանմարաշը, Հաթայը, Օսմանիեն, Ադիյամանը, Մալաթիան, Շանլըուրֆան, Ադանան, Դիարբեքիրը և Քիլիսը։ TRT-ն և Haberturk-ը հեռարձակել են Քահրամանմարաշի ավերված շենքի շուրջ հավաքված մարդկանց կադրեր, որոնք փնտրում են ողջ մնացածներին:

Դիարբեքիրում BBC-ի թուրքական ծառայության թղթակիցը հայտնում է, որ քաղաքում փլուզվել է առևտրի կենտրոնը։
Հետցնցումները զգացվել են մայրաքաղաք Անկարայում և Թուրքիայի այլ քաղաքներում, ինչպես նաև ամբողջ տարածաշրջանում՝ Կիպրոսում, Լիբանանում և Սիրիայում։

Սիրիական պետական լրատվամիջոցները հաղորդում են, որ Հալեպի նահանգում մեծ թվով շենքեր են փլուզվել, Համայի քաղաքացիական ծառայության աղբյուրը ևս հայտնել է մի քանի շենքի փլուզման մասին փոխանցում է Reuters-ը:

«Ես սարսափած արթնացա, մենք բոլորս հագնված և կանգնած ենք դռան մոտ։ Տան պատերից նկարներ են ընկել»,- Reuters-ին պատմել է Դամասկոսի բնակիչ Սամերը։

Ականատեսները պատմել են, որ մարդիկ Դամասկոսում, ինչպես նաև լիբանանյան Բեյրութ և Տրիպոլի քաղաքներում, վազել են փողոցներ և նստել մեքենաներ, որպեսզի փլուզման դեպքում հեռանան իրենց տներից:

Գազայում BBC-ի պրոդյուսեր Ռուշդի Աբուալուֆը պատմել է, որ տունը, որտեղ ինքն ապրում է, ցնցվել է մոտ 45 վայրկյան:

Տաթև Ֆռանգյան