Հրատապ քննարկում՝ ԱԺ-ում․ ընդդիմությունը պահանջում է Պապիկյանից գալ խորհրդարան․ ՏԵՍԱՆՅՈՒԹ

Նիկոլ Փաշինյանի՝ ԶՈՒ բարեփոխելու  հայտարարությունից երկու տարի անց այդպես էլ չի հրապարակվել բարեփոխման հայեցակարգը։ Չնայած՝ Պաշտպանության նախարարությունը հայտարարել և արդեն իրագործում է սպաների վերապատրաստման «Պաշտպան հայրենյաց» ծրագիրը, սակայն, բարեփոխումների ամբողջական փաթեթը հանրությանը հասանելի չէ։ Խորհրդարանական ընդդիմությունը պատրաստվում է  մյուս շաբաթ մեկնարկող ԱԺ քառօրյա նիստերի ընթացքում ԶՈՒ-ում առկա խնդիրների վերաբերյալ հրատապ քննարկում անցկացնել։

Հարցի հիմնական զեկուցողը Գեղամ Մանուկյանն է, նիստին հրավիրել են նաև  պաշտպանության նախարար Սուրեն Պապիկյանին՝ որպես հարակից զեկուցող։ Ազգային ժողովից Factor TV-ին հայտնեցին, որ ԱԺ կանոնակարգ սահմանադրական օրենքը հանրային հետաքրքրություն ներկայացնող հարցերի քննարկման ժամանակ հարակից զեկուցող չի նախատեսում, նման հարցերը կարգավորում են հիմնականում քաղաքական պայմանավորվածություններով։ Ընդդիմադիրները Պապիկյանին նիստին հրավիրելու գրությունը փոխանցել են ԱԺ նախագահին, իսկ ՊՆ-ից էլ հայտնեցին, որ թեմային կանդրադառնան առաջիկայում։ Մինչ Պապիկյանի դիրքորոշման հստակեցումը ընդդիմադիրները հայտարարում են՝ ռազմական գերատեսչության ղեկավարին հարցեր ունեն։

Ի դեպ, այսօր ՊՆ հայտնեց, որ Սուրեն Պապիկյանն այսօրվանից անակնկալ այցեր է ունենալու զորամիավորումներ ու զորամասեր։ Հրապարակված կադրերից պարզ է դառնում, որ Պապիկյանն այցելել է համեմատաբար ավելի բարվոք պայմաններում գտնվող կառույցներ։

Ընդդիմադիրներին հետաքրքրում է՝ ինչպե՞ս է ստացվել, որ 44-օրյա պատերազմից երկու տարի անց զինվորները դիրքերում դեռ, այսպես կոչված, «ժեշտից» կացարաններում են։

ԱԺ պաշտպանության և անվտանգության հարցերի հանձնաժողովի նախագահի տեղակալը, որը չի հերքում դիրքերում առկա անմխիթար իրավիճակը, միաժամանակ պնդում է՝ այնքան աշխատանք է կատարվել, որ զարմանք է առաջացնում։

ԱԺ «Պատիվ ունեմ» խմբակցության պատգամավոր Տիգրան Աբրահամյանը տարակուսելի է համարում ՔՊ-ականների այն հայտարարությունները, թե Զինված ուժերում ահռելի բարեփոխումներ են իրականացվել։

Նշենք, որ «Հայաստան» խմբակցությունը Զինված ուժերում առկա խնդիրների քննարկումը նախաձեռնել է փետրվարի 7-ին՝ նույն այն օրը, երբ  Գլխավոր դատախազությունը պատրաստվում է գալ խորհրդարան և քննարկել խմբակցության ղեկավար Սեյրան Օահանյանին մեղադրյալ ներգրավելու վերաբերյալ հարցը։ Գեղամ Մանուկյանը Factor TV-ի հարցին, թե այս օրն է ընտրվել, որպեսզի ստվերվի՞ Օհանյանին առնչվող հարցը, նշեց՝ պատահականություն է։

Ի դեպ, Օհանյանին մեղադրյալ ներգրավելու մասին հարցն էլ իշխանությունների օրակարգում հայտնվեց Ազատ գյուղում տեղի ունեցած դժբախտ պատահարից մեկ օր անց։ ՔՊ-ականներն էլ իրենց հերթին պնդում էին՝ պատահականություն է։

Մանրամասները՝ տեսանյութում։

Նարեկ Կիրակոսյան