Ալիևի «երկաթե բռունցքը» շարունակում է կոտրվել ադրբեջանցիների վրա․ Ադրբեջանում թանկացումներ են

Ադրբեջանի Սակագնային խորհրդի հերթական նիստում նախօրեին  քննարկվել են տրանսպորտային ընկերությունների հայտերը և հաստատվել են հասարակական տրանսպորտում ուղևորափոխադրումների ծառայությունների նոր սակագները։ Տեղական լրատվականների հաղորդմամբ` մետրոյում մեկ երթևեկի արժեքը կկազմի 0,4 մանաթ, ներքաղաքային ավտոբուսային կանոնավոր երթուղիները՝ 0,4 մանաթ, քաղաքամերձ և միջքաղաքային ավտոբուսային երթուղիները՝ կախված հեռավորությունից՝ 0,40 – 1,00 մանաթ։

Այսպիսով, ներքաղաքային ավտոբուսային տրանսպորտի և Բաքվի մետրոյի ուղեվարձը բարձրացվել է 33%-ով (նախկինում՝ 0,3 մանաթ)։ Միջքաղաքային ավտոբուսային երթուղիների ուղեվարձի շեմը սահմանվում է 3 կոպեկ կիլոմետրի համար (նախկին փոխարժեքը 2,4 կոպեկ էր)։

Բացի այդ բարձարցվել են նաև 31 դեղամիջոցների գները։ Որոշումն ուժի մեջ է մտնում 2023 թվականի փետրվարի 3-ից։

Այս նոր թանկացումները համացանցում առաջացրել են ադրբեջանցիների բողոքներն ու դժգոհությունները։ Քիչ չեն նաև հեգնական մեկնաբանությունները, թե նախագահ Իլհամ Ալիևի «երկաթե բռունցքը» ինչ վիճակի է հասցրել երկիրը։

Ուշագրավ է, որ Վերջերս էլ նախագահ Ալիևը տեղական հեռաընկերությոններին հարցազրույց էր տվել՝ խոսելով Ադրբեջանի տնտեական «ձեռքերումների մասին»։ Ժանրի կանոններին համապատասխան Ալիևի գովքով զբաղված հեռուստաընկերությունների «լրագրողներն» էլ նախօրոք  համաձայնեցված հարցեր էին հնչեցնում։ Հարցազրույցն ուղիղ եթերով հեռարձակվել էր նաև տեղական հեռուստաընկերությունների սոցիալական ցանցերում: Եթերի ընթացքում քաղաքացիները գրել էին իրենց բողոքները սոցիալական խնդիրների վերաբերյալ։ Ուղիղ հեռարձակումից հետո մեկնաբանությունները հեռացվել էին, իսկ մեկնաբանությունների բաժինը փակվել։

Ի դեպ, ադրբեջանցիներին, հատկապես դուր էր եկել Ալիևի հարցազրույցի տնտեսությանը նվիրված բաժինը, որում նախագահը խոսում էր  «երկրի տնտեսության զարգացման, աշխատավարձերի ու թոշակների բարձրացման, բնակչության սոցիալական բարձր մակարդակի մասին»։ Սոցիալական ցանցերում Ալիևի այս հայտարարությունները առաջացրել են հեգնական մեկնաբանություններ։

Հավելենք, որ Արցախյան 44-օրյա  պատերազմից հետո Ադրբեջանում արդեն մի քանի անգամ բարձրացել են  բնական գազի, էլեկտրաէներգիայի, ջրի, բեզինի, դիզվառելիքի, ինչպես նաև սպառողական ապրանքների գները։

Էմմա Չոբանյան