28.04.2026 | 16:40
Էմանուել Մակրոնը կանխատեսում է արել ՊՍԺ – «Բավարիա» հանդիպման վերաբերյալ
Ադրբեջանում 39 մարդ է ձերբակալվել․ Բաքուն կրկին հայտնում է «իրանական լրտեսական ցանցի» բացահայտման մասին
Քաղաքականություն
01.02.2023 | 13:33
Ադրբեջանի ՆԳՆ-ն հատուկ օպերատիվ գործողություններ է իրականացրել ու ձերբակալել 39 մարդու։ Տեղական լրատվամիջոցները պնդում են, որ «նոր լրտեսական ցանց է» բացահայտվել , որի անդամները «կրոնական քողի տակ դիվերսիոն գործողություններ են իրականացրել»։
Նշվում է, որ նրանք «սոցիալական ցանցերում քարոզչություն են իրականացրել հօգուտ Իրանի, չարաշահել են Ադրբեջանում կրոնի ազատությունը և կատարել հանձնարարություններ իրանական հատուկ ծառայությունների կողմից՝ տապալելու Ադրբեջանում ձևավորված հանդուրժողականության ավանդույթները»։ Հաղորդվում է նաև, որ տվյալ «անձինք, օգտագործելով Իրանի ատրիբուտները, ինչպես նաև պարսկերեն տարբեր գրություններով սև դրոշները, սոցիալական ցանցերում և կրոնական արարողությունների ժամանակ, որոնց մասնակցում են Ադրբեջանի քաղաքացիներ, կրոնական խտրականություն դրսևորելու և միջկրոնական ատելություն սերմանելու նպատակով խառնաշփոթ են առաջացրել հասարակության մեջ և հավաքագրված տեղեկատվությունը փոխանցել են հատուկ ծառայություններին, որոնցից հանձնարարություններ են ստացել»։
Ադրբեջանական ԶԼՄ-ները երեկ ևս հայտնել էին, որ ՆԳՆ-ն գործողություն է իրականացրել «իրանական գործակալների ցանցի դեմ» SalamNews և Interaz լրատվական գործակալություններում, ձերբակալվել էր 7 մարդ։
Հավելենք, որ ամեն անգամ, երբ որոշակի լարվածություն է առաջանում Իրանի և Ադրբեջանի հարաբերություններում, Բաքուն դիմում է արդեն իսկ փորձված մեթոդին ու սկսում է հետապնդել իրանամետ գործիչներին, հատկապես՝ հոգևոր, որոնց ձերբակալությունները սկսել են պարբերական բնույթ կրել։
Էմմա Չոբանյան
