Քաղաքականություն
31.01.2023 | 13:32
2022 թ. դեկտեմբերի սկզբից Եվրոպական Միությունն ուշադիր հետևում է Լաչինի միջանցքի երկայնքով և դրա շուրջ տեղի ունեցող իրադարձություններին, սակայն սրա հետ մեկտեղ չի դիտարկում Ադրբեջանի հանդեպ պատժամիջոցներ կիրառելու հարցը։ Այս մասին նշված է Եվրախորհրդարանի պատգամավոր Ասսիտա Կանկոյի պաշտոնական հարցմանը ԵՄ արտաքին և անվտանգության քաղաքականության հարցերի բարձր ներկայացուցիչ Ժոզեպ Բորելի պատասխանում:
«2022 թվականի դեկտեմբերի սկզբից ԵՄ-ն ուշադիր հետևում է Լաչինի միջանցքի երկայնքով և դրա շուրջ զարգացումներին և դրանց հումանիտար հետևանքներին։ Բարձր ներկայացուցիչ/փոխնախագահ Բորելը կանոնավոր կապի մեջ է երկու կողմերի արտգործնախարարների հետ։
ԵՄ հատուկ ներկայացուցիչ Կլաարը նույնպես սերտ կապի մեջ է երկու կողմերի հետ: ԵՄ-ն կոչ է արել Ադրբեջանին ձեռնարկել միջոցներ, որոնք գտնվում են իր իրավասության մեջ՝ ապահովելու միջանցքով տեղաշարժի ազատությունն ու անվտանգությունը՝ 2020 թվականի նոյեմբերի 9-ի եռակողմ հայտարարությունից բխող իր պարտավորություններին համապատասխան»,- ասված է պատասխանում։
2022 թվականի հոկտեմբերի 6-ին Պրահայում ձեռք բերված պայմանավորվածության համաձայն՝ ԵՄ մոնիտորինգային կարողությունները տեղակայվեցին Հայաստանում առավելագույնը երկու ամսով և ավարտեցին գործունեությունը 2022 թվականի դեկտեմբերի 19-ին: ԵՄ-ն սկսել է ներգրավվածության նոր փուլ՝ ի պատասխան Հայաստանի խնդրանքի։Անդրադարձ է կատարվել նաև Հայաստանում երկու ամսով ԵՄ առաքելության տեղակայմանը և այժմ ԵՄ քաղաքացիական նոր առաքելության տեղակայմանը երկու տարով՝ Հայաստանի դիմումի համաձայն:
«Առաքելության նպատակն է նպաստել Հայաստանի սահմանամերձ շրջաններում կայունությանը, տեղում վստահության ձևավորմանը, ինչպես նաև ապահովել ԵՄ կողմից աջակցվող Հայաստանի և Ադրբեջանի միջև հարաբերությունների կարգավորման ջանքերին նպաստող միջավայրը»,-ասված է հարցման պատասխանում:
Անդրադարձ է եղել նաև Ադրբեջանի իշխանությունների նկատմամբ պատժամիջոցների կիրառման վերաբերյալ հարցին․
«Պատժամիջոցները ԵՄ-ի ընդամենը մեկ գործիք են ընդհանուր արտաքին և անվտանգության քաղաքականության նպատակների առաջմղման համար և այս դեպքում դրանք չեն դիտարկվում»։
Տաթև Ֆռանգյան
