Սիրիայում հարձակման է ենթարկվել Իրանի հետ կապված բեռնատարների շարասյունը

Սիրիայում օդային հարձակման հետևանքով ոչնչացվել է Իրաքից երկիր մտած վեց բեռնատար, հայտնել է Լոնդոնում գործող Մարդու իրավունքների սիրիական դիտորդական կենտրոնը, որը վերահսկում է տարածաշրջանում ռազմական գործողությունները, գրում է DW-ի ռուսական ծառայությունը:

Դիտորդների տվյալներով՝ Սիրիայի և Իրաքի սահմանին գտնվող Աբու Քեմալ քաղաքի մոտ անօդաչու սարքերը հարձակվել են 25 բեռնատարներից բաղկացած շարասյան վրա։ Սիրիայի կառավարամետ Sham FM ռադիոկայանը նույնպես հայտնել է, որ շարասյունը գնդակոծվել է, թեև ըստ կառավարության խոսնակի՝ վնասվել է միայն մեկ բեռնատար։ Al Arabiya հեռուստաալիքի աղբյուրները, նշում են, որ ավտոշարասյան մեքենաները զենք էին տեղափոխում Իսլամական հեղափոխության պահապանների կորպուսի (ԻՀՊԿ) կողմից վերահսկվող և Սիրիայի արևելքում տեղակայված խմբերի համար:

Սա առաջին նման հարձակումը չէ տարածաշրջանում ռազմական շարասյունների վրա. նմանատիպ միջադեպ էր տեղի ունեցել 2022 թվականի նոյեմբերին։ Այն ժամանակ անօդաչուները գնդակոծել էին ավտոշարասյունը, որն, ըստ սիրիացի դիտորդների, վառելիք և զենք էր տեղափոխում Իրանի հետ կապված կազմավորումների համար։

Սիրիայում ավտոշարասյանն ուղղված հարվածներից ընդամենը մեկ օր առաջ պայթյուններ էին տեղի ունեցել Իրանի երկու նահանգներում. Սպահանում հարձակման էր ենթարկվել պաշտպանության նախարարության օբյեկտը, իսկ Ազարշահր քաղաքի շարժիչային յուղի արտադրության գործարանում պայթյուն էր որոտացել։

Տաթև Ֆռանգյան