Պուտինյան ռեժիմը տապալվելու է. ակցիա Գյումրիի ռուսական ռազմաբազայի մոտ․ ՏԵՍԱՆՅՈՒԹ

«Ազգային-ժողովրդավարական բևեռ» կուսակցության ներկայացուցիչներն այսօր հերթական անգամ Արցախի ապաշրջափակման, Հայաստանից ռուսական զորքերի հեռացման պահանջով ցույց անցկացրեցին Գյումրու 102-րդ ռազմաբազայի մոտ։ Այս անգամ նրանք ռազմաբազան շրջափակելու փորձեր չարեցին, այլ ելույթներ ունեցան՝ վերլուծելով տարածաշրջանում ստեղծված իրավիճակը։ Ու քանի որ առատ ձյուն էր տեղում, եղանակն անբարենպաստ էր, ԱԺԲ-ի խորհրդի անդամները մասնակիցներին հրավիրեցին թեյախմության՝ քննարկումները շարունակելու նպատակով։

Մինչ այդ իրենց ելույթենրում շեշտադրեցին այն միտքը, որ ռուս խաղաղապահները ցանկության դեպքում անգամ հնարավորություն չունեն մեր անվտանգությանը երաշխավոր լինելու, հետևաբար՝ և՛ ռուսական զորքը պիտի հեռանա, «և՛ մենք պետք է սեղմենք իրական դաշնակիցների ձեռքը»։

«Մենք շարունակում են պնդել, որ նոր աշխարհակարգի ստեղծման գործընթացները գնում են հանգուցալուծման, և դրանով է պայմանավորված, որ վիճակը փոխվում է օր օրի, ժամ առ ժամ։

Այն, ինչ տեղի ունեցավ գիշերը Իրանում և՛ անսպասելի էր, և՛ սպասելի է, մենք գիտեինք, որ Իրանում գոնե ներքին խմորումներ կան, մի քանի ամիս մենք տեսնում էինք Իրանի զարգացումները»,- ասաց Վահե Գասպարյանը։
Բանախոսները կարծիք հայտնեցին, որ նախագահական ընտրություններից հետո գուցե անկայունություն սկսվի նաև Թուրքիայում, անդրադարձան ռուս-ուկրաինական պատերազմին՝ համոզմունք հայտնելով, որ պուտինյան ռեժիմը տապալվելու է,  Ռուսաստանը տարածաշրջանից հեռանում է։

Ցուցարարները պարբերաբար բացականչում էին․ «Ազատ, անկախ Հայաստան», «ՀԱՊԿ-ից դուրս», «Արցախը Հայաստան է, և վերջ»։ Ակցիայի մասնակիցները կարծիք հայտնեցին, որ եվրոպական դիտորդներին Հայաստան գործուղելու որոշմամբ «զսպվում է թուրք-ռուսական ախորժակը Հայաստանում»։

Ելույթ ունեցավ ցույցին մասնակցող ազգությամբ ռուս Արսենի Սախորովը, որը տարիների առաջ տեղափոխվել է բնակության Ուկրաինա։ Բանախոսը նշեց, որ հավաքվել են Ռուսաստանին ցույց տալու, որ չեն վախենում, պայքարելու են ռուսական օկուպացիայի դեմ, որը «տեռորի է ենթարկում Ուկրաինան, Հայաստանը և անկախության ձգտող բոլոր երկրներին»։

Արմիկ Մովսիսյան