Քաղաքականություն
27.01.2023 | 23:30
Ռեջեփ Թայիփ Էրդողանը չի կարող առաջադրվել նախագահի պաշտոնում երրորդ ժամկետի համար, քանի դեռ Թուրքիայի Ազգային ժողովը չի համաձայնել արտահերթ ընտրությունների անցկացմանը։ Այս մասին ասվում է Թուրքիայի ընդդիմադիր կուսակցությունների համատեղ հայտարարության մեջ, որը հաջորդել է կուսակցությունների առաջնորդների՝ 9 ժամ տևած հանդիպմանը, գրում է Bianet-ը:
Թուրքիայում նախագահական և խորհրդարանական ընտրությունները պաշտոնապես նշանակված էին հունիսի 18-ին։ Էրդողանը, սակայն, օրերս ասել է, որ կօգտագործի իր իշխանությունը՝ մարտի 14-ին կայանալիք քվեարկության համար ընտրական գործընթաց սկսելու նպատակով։
«Այն փաստը, որ նախագահը 3-րդ անգամ հայտարարեց իր առաջադրման մասին՝ խախտելով Սահմանադրությունը, մեր ժողովրդավարության պատմության ևս մեկ սև էջ է»,- ասվում է ընդդիմության առաջնորդների հայտարարության մեջ, որը նաև հայտնի է որպես «Վեցյակի հարթակ»։
Էրդողանը, որը պաշտոնը ստանձնել է 2014 թվականին, ներկայում նախագահական իր երկրորդ ժամկետն է ավարտում, ինչը Սահմանադրությամբ նրա ժամկետի առավելագույն տևողությունն է։ Սակայն Էրդողանի իշխող «Արդարություն և զարգացում» կուսակցությունը կարծում է, որ Սահմանադրությունը չի խանգարում Էրդողանին կրկին առաջադրվել այդ պաշտոնում, քանի որ այն առաջին անգամ կիրառվել է 2018 թվականի ընտրություններում։
«Բայց մենք պատրաստ ենք ընտրություններին՝ ժողովրդի աջակցությամբ, մեր հանդեպ հավատով և մեր երկրի հանդեպ սիրով»,- ասել են ընդդիմության առաջնորդները, որոնք ցանկանում են միավորել ուժերը Էրդողանի դեմ, սակայն նախագահական ընտրություններում դեռ միասնական թեկնածուի անուն չեն հայտարարել։
Ըստ աղբյուրների՝ ընդդիմադիր դաշինքը փետրվարի 13-ին կայանալիք հաջորդ հանդիպումից հետո կավարտի թեկնածուի փնտրտուքը։ Թեև վեց միասնական թեկնածուի անունը մինչ օրս չի նշվում, սակայն կուլիսներում թեկնածուի մասին խոսակցությունները վաղուց են ընթանում։
Ժողովրդահանրապետական կուսակցությունը պնդում է իր ղեկավար Քեմալ Քըլըչդարօղլուի թեկնածության հարցում, որը, սակայն, վիճարկում են «Լավ» կուսակցության բարձրաստիճան անդամները, որոնք կարծում են, որ նա դժվարությամբ կարող է հաղթել:
Էմմա Չոբանյան
