30.11.2024 | 01:27
ՀՀ-ն հետ է կանչել Սիրիայում հումանիտար ականազերծման և բուժաշխատողների մասնագիտական խմբի ողջ անձնակազմին
Բաքուն Թեհրանում Ադրբեջանի դեսպանատան վրա հարձակումն «ահաբեկչություն» է համարում
Քաղաքականություն
27.01.2023 | 15:38
Պաշտոնական Բաքուն Իրանում Ադրբեջանի դեսպանատան վրա այսօր առավոտյան իրականացված հարձակումն «ահաբեկչություն» է որակել։
Մասնավորապես, Ադրբեջանի նախագահ Իլհամ Ալիևը դատապարտել է դեսպանատան վրա հարձակումը՝ այն գնահատելով որպես «ահաբեկչություն»։ Նա Իրանի իշխանություններից պահանջել է անհապաղ հետաքննել հանցագործությունը և պատժել «ահաբեկիչներին»։
«Ես խստորեն դատապարտում եմ Թեհրանում մեր դեսպանատան դեմ այսօր իրականացված ահաբեկչությունը։ Ցավակցում եմ ավագ լեյտենանտ Օրհան Ասկերովի ընտանիքին և հարազատներին, որը զոհվել է դեսպանատունը և նրա աշխատակիցներին հսկելիս։ Մենք պահանջում ենք այս ահաբեկչության արագ հետաքննություն և ահաբեկիչների պատիժ։ Դիվանագիտական ներկայացուցչությունների դեմ ահաբեկչական հարձակումներն անընդունելի են»,- գրել է Ալիևը Թվիթերում։
Ադրբեջանի այլ պաշտոնյաներ ևս հարձակումը ներկայացնում են որպես ահաբեկչություն․ ԱԳ նախարար Ջեյհուն Բայրամովը դատապարտել է հարձակումը՝ այն «ահաբեկչական ակտ» որակելով։
Հավելենք, որ Իրանի պատկան մարմիններն արդեն ձերբակալել են զինված հարձակումն իրագործած անձին, որը նշել է, թե անձնական շարժառիթով է դիմել այդ քայլին։
Էմմա Չոբանյան
