16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Զինված հարձակումից հետո Բաքուն պատրաստվում է տարհանել Իրանում դեսպանատան աշխատակիցներին
Քաղաքականություն
27.01.2023 | 14:36
Ադրբեջանի ԱԳՆ խոսնակ Այխան Հաջիդազեն հայտնել է, որ ներկայում Բաքուն նախապատրաստում է Իրանում դեսպանատան աշխատակիցների տարհանումը՝ առավոտյան զինված հարձակումից հետո, գրում են տեղական լրատվամիջոցները։
«Մենք դատապարտում ենք այս հարձակումը և պահանջում ենք իրանական կողմից՝ կարճ ժամանակում գտնել և հանրությանը բացահայտել այն կատարողների, ինչպես նաև պատվիրատուների անունները։ Իրանական կողմը, որպես ընդունող կողմ, պետք է կանխեր դեսպանատան վրա ցանկացած հարձակում և պետք է ապահովեր անվտանգությունը, սակայն, ցավոք, դա չի արվել»,- ասել է Հաջիզադեն թուրքական TRT Haber հեռուստաալիքին տված մեկնաբանությունում։
Նա հավելել է, որ համապատասխան աշխատանքներ են տարվում։
«Մենք իրանական կողմից ևս պահանջում ենք համապասխան միջոցառումներ։ Բացի այդ՝ աշխատանք է տարվում դեսպանատան անվտանգության ապահովման ուղղությամբ, ընթանում է Ադրբեջանի դեսպանատան աշխատակիցների տարհանման աշխատանքների պլանավորում»,- ասել է ԱԳՆ խոսնակը։
Հաջիզադեն հավելել է, որ Բաքուն չի հավատում, որ «Իրանում Ադրբեջանի դեսպանատան վրա հարձակումն իրականացվել է անձնական պատճառներով»։
Ադրբեջանի պետական ու քարոզչական լրատվամիջոցների, տարբեր փորձագետների, նաև նախագահի միջոցով ամիսներ շարունակ հակաիրանական քարոզչություն իրականացնող և Իրանի նկատմամբ տարածքային պահաջներ ներկայացնող Բաքուն, փաստորեն, Թեհրանին մեղադրում է հակաադրբեջանական քարոզչության մեջ։ Ըստ Հաջիզադեի՝ հենց դա էլ եղել է հարձակման խթանը։
Հիշեցնենք, որ այսօր առավոտյան Թեհրանում զինված անձը հարձակվել է Ադրբեջանի դեսպանատան վրա, որի հետևանքով սպանվել է անվտանգության ծառայության պետը, ևս երկու աշխատակից վիրավորվել է։
Էմմա Չոբանյան
