04.05.2024 | 14:15
Տեղատարափ անձրևի հետևանքով 15 րոպեում 2111 ահազանգ է ստացվել 267 դեպքի վերաբերյալ․ ՆԳՆ ՓԾ-ն մանրամասներ է հայտնում
Իրանը հայտնում է Ադրբեջանի դեսպանատան վրա հարձակվողի ձերբակալման մասին
Քաղաքականություն
27.01.2023 | 12:56
Իրանի մայրաքաղաքի ոստիկանության պետ, բրիգադային գեներալ Ռահիմին հայտարարել է, որ Ադրբեջանի դեսպանատուն հրազենով ներուժած անձը ձերբակալվել է, գրում է իրանական Mehr գործակալությունը։
«Այս անձն այսօր առավոտյան հրազենով (AK-47 ինքնաձիգ) մտել է Ադրբեջանի դեսպանատուն․ հարձակման հետևանքով մեկ մարդ զոհվել է, երկուսը՝ վիրավորվել։ Ոստիկանության արագ գործողությունների արդյունքում հարձակվողն անմիջապես ձերբակալվել է»,- ասել է Ռահիմին։
Նա նշել է, որ հարձակվողը մտել է դեսպանատուն իր երկու անչափահաս երեխաների հետ՝ հավելելով, որ «նախնական քննությունը ցույց է տալիս, որ հարձակվողի շարժառիթն անձնական և ընտանեկան խնդիրներն են»։
Թեհրանի քրեական դատարանի դատախազը հայտնել է, որ նախաքննության ընթացքում ամբաստանյալը պնդել է, որ անցյալ տարվա ապրիլին իր կինը գնացել է Թեհրանում Ադրբեջանի դեսպանատուն և տուն չի վերադարձել։ Պաշտոնյայի խոսքով՝ անձը պատմել է, թե որևէ պատասխան չի ստացել դեսպանատնից իր բազմաթիվ այցերի ժամանակ և մտածել է, որ իր կինը թաքնվում է այնտեղ և չի ցանկանում հանդիպել իրեն։
Հիշեցնենք, որ այսօր առավոտյան Թեհրանում զինված անձը հարձակվել է Ադրբեջանի դեսպանատան վրա, որի հետևանքով սպանվել է անվտանգության ծառայության պետը, ևս երկու աշխատակից վիրավորվել է։
Էմմա Չոբանյան
