Բրազիլիան և Արգենտինան հարավամերիկյան միասնական արժույթ կստեղծեն, որը կարող է դառնալ երկրորդ խոշորագույնն աշխարհում

Բրազիլիայի և Արգենտինայի իշխանությունները կսկսեն աշխատել միասնական արժույթ ստեղծելու ուղղությամբ, հայտարարել են երկու երկրների նախագահներ Լուիս Ինասիու Լուլա դա Սիլվան և Ալբերտո Ֆերնանդեսը արգենտինական Perfil շաբաթաթերթում հունվարի 22-ին հրապարակված համատեղ հոդվածում, գրում է DW-ի ռուսական ծառայությունը։

«Մենք որոշել ենք շարունակել քննարկումները Հարավային Ամերիկայի միասնական արժույթի գաղափարի շուրջ, որը կարող է օգտագործվել ինչպես ֆինանսական, այնպես էլ առևտրային գործարքների համար՝ նվազեցնելով ծախսերը և մեր արտաքին կախվածությունը»,- ասված է երկու երկրների գործող ղեկավարների՝ վերջին երեք տարվա ընթացքում առաջին հանդիպմանն ընդառաջ գրված հոդվածում։

Financial Times-ն առաջինն էր, որ գրեց Հարավամերիկյան երկու խոշորագույն տնտեսությունների պլանների մասին։ Միասնական արժույթի նախագիծը կքննարկվի Բուենոս Այրեսի գագաթնաժողովում, և Լատինական Ամերիկայի այլ երկրներ կհրավիրվեն մասնակցելու, հաղորդում է պարբերականը։

«Ես չեմ ուզում կեղծ ակնկալիքներ ստեղծել: Սա առաջին քայլն է երկար ճանապարհորդության, որը պետք է անցնի Լատինական Ամերիկան», – զգուշացրել է Արգենտինայի էկոնոմիկայի նախարար Սերխիո Մասսան:

Նրա խոսքով՝ նախագծի իրականացման համար, ամենայն հավանականությամբ, երկար տարիներ կպահանջվեն։ Մասսան հիշեցրել է, որ եվրոյի ստեղծման համար Եվրոպայից պահանջվել է 35 տարի։ Բրազիլիան առաջարկում է արժույթն անվանել «sur» (իսպաներեն՝ «հարավ»):

Նախնական ծրագրերից հետևում է, որ խոսքը նոր արժույթի ստեղծման մասին է, որը շրջանառության մեջ կմտնի բրազիլական ռեալին և արգենտինական պեսոյին զուգահեռ։ Եթե ​​Հարավային Ամերիկայի մնացած մասը միանա նախագծին, ապա արժութային միությունը կապահովի համաշխարհային ՀՆԱ-ի մոտ 5 տոկոսը, ինչը նրան կդարձնի աշխարհում երկրորդը, հաշվարկել է FT-ն: Աշխարհի խոշորագույն արժութային միությունը՝ եվրոգոտին, կազմում է համաշխարհային ՀՆԱ-ի մոտ 14 տոկոսը:

Տաթև Ֆռանգյան