««Ով մեզ հետ չէ, մեր դեմ է» սկզբունքն անընդունելի է»․ ՀՅԴ-ն վարչապետի երեկվա հայտարարության մասին. ՏԵՍԱՆՅՈՒԹ

Դաշնակցական Արմեն Ռուստամյանն ուզում է հիշեցնել, որ եթե Դաշնակցությունն այսօր կառավարությունում աշխատում է «Քաղաքացիական պայմանագրի» հետ, չի նշանակում, որ իր գաղափարախոսությունը մի կողմ է դնում և պետք է անպայման կողմ լինի պարտադիր կուտակային կենսաթոշակային համակարգին, որին միշտ դեմ է եղել։

«Ճիշտ կլիներ կոալիցիոն հուշագիր ստորագրել և էս սկզբունքային հարցերը միասին քննարկել»,- ասում է պարոն Ռուստամյանը։

Կառավարության երեկվա նիստում Նիկոլ Փաշինյանի և Արծվիկ Մինասյանի միջև տեղի ունեցավ, այսպես կոչված, լեզվակռիվ, որի ժամանակ պարոն Մինասյանը հիշեցրեց, որ Դաշնակցությունը դեմ է «պարտադիր» բաղադրիչին։ Փաշինյանը Արծվիկ Մինասյանին զգուշացրեց, որ «ով մեզ հետ չէ, մեր դեմ է»։

«Եթե պիտի նկատենք, որ կառավարությունն այլևս պիտի քվեարկություններով չառաջնորդվի, ուրեմն մենք լրիվ ուրիշ տեղ ենք հայտնվում, «ով մեզ հետ չէ, մեր դեմ է» սկզբունքը լրիվ անընդունելի եմ համարում»,-զգուշացնում է դաշնակցական պատգամավորը։

Արմեն Ռուստամյանը հիշեցնում է, որ Դաշնակցությունը շարունակում է դեմ լինել պարտադիր կուտակայինին։ Նա խուսափում է գնահատել Նիկոլ Փաշինյանի գործողությունները, սակայն երեկվա վիճաբանության մեջ Փաշինյանի դիրքորոշումները նրան հիշեցնում են խորհրդային մղձավանջի մի դրվագ։ «Էս երկիրը նմանվում է էն ստալինյան թեզին, որ սովետական ժողովուրդը ուզում է ապրել երջանիկ, և մենք կստիպենք, որ նա ապրի երջանիկ։ Այսինքն՝ ստիպելու, պարտադրանքի էլեմենտները մենք պետք է մեր կենցաղից հանենք»,- կոչ է անում նա։

Դաշնակցական պատգամավորը զգուշացնում է, որ ոչ ոք չի կարող 128-ամյա կուսակցությանը ստիպել հրաժարվել իր դիրքորոշումներից, նա ակնարկում է, որ կառավարությունները ժամանակավոր են։ «Մենք խնդիր չենք դրել անպայման լինել կառավարության մեջ, կամ մենք չենք ասում, որ առանց մեզ որևէ մեկը չի կարող յոլա գնալ»,- վստահեցնում է պատգամավորը։

Այնուամենայնիվ, ինչու՞ պարտադիր բաղադրիչին դեմ խոսող Արծվիկ Մինասյանը կողմ քվեարկեց նույն բաղադրիչի ուժի մեջ մտնելուն։ Արմեն Ռուստամյանը դրա բացատրությունն ունի՝ քվեարկեց, որովհետև աշխատավարձից պահվող տոկոսները պակասել են։ «Դա բացատրում եմ նրանով, որ, ի վերջո, այն նախաձեռնությունը, որը հիմա սեղանի վրա կա, սա քայլ առաջ է համեմատած այն վիճակին, որ եթե սա չարվեր, կմնար ավելի վատ իրավիճակ»,- պարզաբանում է նա։

Այսօր պարոն Ռուստամյանը դեռ չունի այն տպավորությունը, որ դաշնակցական նախարարների համար Նիկոլ Փաշինյանի հետ հեշտ չի լինելու։ Բոլոր դեպքերում սպասվող դժվարություններից չեն սարսափում։ «Մենք պատրաստ ենք մեր սկզբունքները պաշտպանել, արել ենք դա միշտ, հիմա էլ ենք շարունակելու անել, անկախ նրանից, թե ով է օրվա վարչապետը»,- արձանագրում է պարոն Ռուստամյանը։

Նա հիշեցնում է, որ կառավարության հետ համագործակցության մեկ փաստաթուղթ գոյություն ունի՝ դա կառավարության ծրագիրն է։ Բոլոր համաձայնությունները պետք է բխեն այդ ծրագրից:

Մհեր Արշակյան